Vdekja e 7-vjeçares, Jonada Avdia ka marrë vëmendjen edhe të mediave britanike. Kështu, Daily Mail shkruan se “vajza britanike humbi jetën në një aksident të tmerrshëm me skaf, teksa ishte për pushime me prindërit e saj në Shqipëri”.
Më tej në shkrimin e tabloidit britanik thuhet se Jonada, e cila jetonte me babanë me origjinë shqiptare Bledarin dhe nënën e saj, me vendlindje Londrën, u plagos për vdekje kur polici që ishte jashtë detyrës, Arjan Tase, kaloi me një skaf në një zonë të caktuar për notarët dhe e goditi atë.
Policia thotë se Tase – i cili është arrestuar – po merrte anëtarët e familjes së tij nga Porto Palermo në Potam kur ndodhi aksidenti.
Tase tani po hetohet, ndërsa 15 oficerë policie që duhet të ruanin ujin atë ditë janë pushuar nga puna.
Media britanike raporton edhe për protestën e një ditë me parë para kryeministrisë: “Me qindra qirinj dhe lule janë vendosur aty ku humbi jetën Jonada, si dhe para Kryeministrisë. Protestat kanë shpërthyer gjithashtu në të gjithë vendin të zemëruar për vdekjen, me dhjetëra marshues që u përleshën dje me policinë në kryeqytetin Tiranë”.
Ndërsa më tej Daily Mail shkruan: Mirela Kumbaro, ministrja e Turizmit, ka hedhur fajin për aksidentin tek Arjan Tase dhe shefi i policisë kombëtare.
Ajo tha për Albanian Daily Neës: “Një engjëll nuk është më mes nesh për shkak të marrëzisë së një njeriu që ka thyer çdo ligj, çdo rregull dhe çdo normë me pasoja tragjikisht të pakthyeshme.
“Me vetëdije se nuk ka fjalë që të shërbejnë si ngushëllim për prindërit, familjen për tragjedinë që pësuan, kërkesa i shkon drejtësisë për të bërë punën e saj, pa kompromis, me dënim maksimal për këdo që shkel ligjin”.
