Ish-shefi i Komisariatit Arjan Tase ka mbërritur sot në Gjykatën e Vlorës, pasi do të njihet me masën e sigurisë.
Kjo, pasi ai me gomone ka përplasur 7-vjeçaren Jonada Avdia. Ndaj Tases rëndon akuza e vrasjes me dashje. Ndaj tij më herët ishte ngritur akuza e “vrasjes nga pakujdesia”, por se më tej u ndryshua.
Arjan Tase, me akuzën e re të ngritur nga Prokuroria rrezikon 10 deri në 20 vjet burg. Ai ka qenë shef komisariati në Himarë dhe më tej shef i Policimit në Komisariatin e Elbasanit.
Ngjarja e rëndë ndodhi më 2 gusht në Plazhin e Potamit. E mitura po lahej në det, kur u përplas fillimisht nga pjesa ballore e gomones dhe më pas trupi i saj është prerë nga helikat duke ndërruar jetë në vend.
Fëmija, me origjinë nga Tropoja jetonte me familjen e saj në Angli, por ishte kthyer në atdhe për pushime.
Për këtë ngjarje të rëndë është shkarkuar zinxhiri drejtues i Policisë Kufitare të Vlorës, si edhe inspektorët përgjegjës. Protestuesit kërkojnë dorëheqjen e ministrave Çuçi, Kumbaro dhe Nano.
