Dy shqiptarë janë arrestuar në Spanjë për kultivim të lëndëve narkotike. Ata kishin krijuar një plantacion me kanabis brenda një magazine dhe u zbuluan për shkak se harxhonin shumë energji elektrike.
Sipas policisë, hetimet nisën marsin e kaluar, kur u konstatua ekzistenca e një plantacioni brenda një magazine industriale. Kompania e energjisë elektrike pikasi se në magazinë ishte lidhur energjia në mënyrë të paligjshme.
Agjentët hynë në magazinën që ndodhej në zonën industrial të Polinya dhe zbuluan 256 bimë narkotikë, ndërsa u vendosën në pranga dy shqiptarët.
Brenda ambientit ndodheshin makineritë për kultivim, llamba, ventilator kondicionerë etj., dhe e gjithë magazina ishte kondicionuar për të vendosur sa më shumë bimë.
Dy të arrestuarit po hetohen si autorë të dyshuar të trafikut të drogës dhe për vjedhje të energjisë elektrike.
