“Dosjet e Sigurimit të Shtetit të hapen që nesër, por debati i hapur së fundmi shërben për të tërhequr vëmendjen nga gjendja katastrofale e vendit”, shprehet përmes rrjeteve sociale deputeti Tritan Shehu. Sipas tij, ajo që ka nevojë ky vend nuk janë “makiazhet » e maxhorancës nëpërmjet «dosjeve» të ruajtura prej saj.
“Është përmbysja e saj, e të gjithës, rrugë tjetër nuk ka! Dhe kjo nuk bëhet në këto kushte regjimi as nga zyrat e as nga «dosjet». Bëhet me një lëvizje të gjerë popullore që tashmë prej 7 korrikut ka filluar dhe që disa duan ta shuajnë…Por gabojnë!”, shkruan ai.
Postimi nga Tritan Shehu
Një histori dosjesh e ngritur pikërisht tashti, me urgjencë, për të hequr vëmendjen nga gjendja katastrofale e vendit, rrugët e zgjidhjes së saj – një histori për të bërë njerëzit “të shpresojnë” në iluziven: “mbas shtatorit, zgjidhja e Çështjes Dosje do të zgjidhë hallet e këtij populli” – një ngrehinë kjo e ngritur qëllimisht për diversion, për të shuar zjarrin e mobilizimit popullor kundër regjimit mbi shpresa sureale, për të shurdhuar tingujt e trumbetave të protestave që po bien fort, pikërisht për të krijuar iluzionin se më në fund u gjet “deus ex machina” e një “Shqipërie të re”, si “Republika e re” e pak viteve më parë:
Mjafton të hapim “dosjet” dhe ne do të bëhemi “Evropë”!!!- Mashtrim ky nga maxhoranca për të gjetur shpëtim duke u kapur mbas “fijes së kashtës”, si i mbyturi tashmë. – Infatile kjo nga ata opozitarë, që i besojnë kësaj dhe e përdorin këtë rebus tymues të Ramës si kalë beteje. – Tradhtare kjo nga ata « opozitarë », që bëhen me koshiencë pjesë e kësaj loje të maxhorancës.
Për mua dosjet a çfarë ka mbetur nga ato, të hapen që nesër. N.q.s. dikush dëshiron të kontrollojë Tritan Shehun mund ta bëjë që sot, ka zyrtarisht autorizimet e mia edhe për të bërë publike çfarë do të gjejë aty. Por ky debat nuk është zgjidhja që kërkon ky vend me urgjencë. Është së paku një tymuese e zgjidhjes, megjithëse qëllimi i Qeverisë është ta përdorë si fikse të revoltës.
Ajo që ka nevojë ky vend nuk janë “makiazhet » e maxhorancës nëpërmjet «dosjeve» të ruajtura prej saj! Është përmbysja e saj, e të gjithës, rrugë tjetër nuk ka! Dhe kjo nuk bëhet në këto kushte regjimi as nga zyrat e as nga «dosjet». Bëhet me një lëvizje të gjerë popullore që tashmë prej 7 korrikut ka filluar dhe që disa duan ta shuajnë…Por gabojnë!
