Ish-deputeti demokrat, Klevis Balliu, përmes rrjeteve sociale, ka publikuar denoncimin e një qytetari, i cili pretendon se të paktën 2500 metra truall në Tiranë, i është grabitur nga Erion Veliaj, Taulant Balla dhe Edi Rama, ndërsa i është dhënë për ndërtim Edmond Begos, i njohur si miku i kreut të Grupit Parlamentar socialist.
“Qytetari akuzon Ramën, Veliajn dhe Ballën për vjedhje të pronës”, shkruan Balliu, ndërsa i bën thirrje institucioneve që të reagojnë.
Ai shprehet se Edi Rama, Erion Veliaj, Taulant Balla po vjedhin pronat e shqiptarëve, ndërsa pyet “Ku është SPAK???”.
“I bëj thirrje institucioneve të drejtësisë dhe Policisë së Shtetit të marrin masa të menjëhershme dhe të ndalojnë menjëherë këtë krim çnjerzor”, shkruan Balliu.
Në videon e publikuar më poshtë, qytetari kërkon ndihmën e ambasadave të akredituara në Tiranë, ndërsa shprehet se megjithëse ka denoncuar në polici e prokurori vjedhjen e pronës, institucionet jo vetëm nuk kanë reaguar, por po mbështesin grabitjen e pronës së tij.
