Kryetari i Partisë Demokratike, Sali Berisha është përgjigjur pas akuzave të kryeministrit Edi Rama se nuk votoi rezolutën që dënonte raportin e Dick Marty.
Gjatë kohës së votimit dje në parlament, Berisha nuk ishte i pranishëm. Në një postim në Twitter këtë të Premte, Rama shprehet mes të tjerash se “mosvotimi është një tjetër arsye neverie për politikën pa din e iman të kinse patriotëve kundër Kosovës”.
Lidhur me reagimin, Berisha u pyet gjatë konferencës së përjavshme që mban me gazetarët të Premteve, lidhur me deklaratat e Ramës.
Berisha tha ai e mbështet rezolutën dhe kujtoi se këtë e shprehu edhe në seancën e djeshme parlamentare. Ai sqaroi se mos prezenca e tij në Kuvend në momentin e votimit erdhi për shkak të angazhimeve personale.
“Për një arsye pune s’mund të isha, por deklarova votën pro, thashë që ne do votojmë këtë rezolutë dhe kjo është kryesorja për pozicionin që unë kam, se ishte vendosur që ne si deputetë ta votojmë rezolutën unë e deklarova në parlament. Obligime të tjera s’më lejuan të isha në parlament, por deklarova votën time pro”, tha Berisha.
Ai shtoi se raportin në fjalë e ka denoncuar në OKB, Këshillin e Europës dhe Parlamentin Europian.
Gjatë fjalës së tij, Berisha hodhi akuza ndaj Ramës se ai i shërben Presidentit serb, Aleksandër Vuçiç.
“Së pari, dje ishte një ditë e keqe, e shëmtuar për parlamentin shqiptar. Ai nuk ishte parlamenti i Shqipërisë, por i një republike vasale të Serbisë. Dje, Edi Rama paraqiti në Kuvend një rezolutë, në të cilën dënon me të drejtë, raportin e Dick Marty. Por, siç është bërë publike që nga viti 2011 gjer sot me dhjetëra herë, raporti i Dick Marty, me dokumente, e bazuar kjo që them, është i shkruar në masën 80 përqind nga Vladimir Vukçeviç, prokurori i krimeve të luftës të Serbisë. Këtë e pohon vetë ai. Një fakt tjetër shumë i rëndësishëm, sepse transplantet e organeve nuk i ka përmendur në Hagë as Millosheviçi, as Stanishiçi dhe as Perishiçi, kjo e bënte, për mua, përveç kontekstit që kurrë nuk ka ndodhur, dëshmonte se ishte fabrikim i shërbimeve serbe, në mënyrë që duke akuzuar për një krim kundër njerëzimit më ekstremin, shkulja dhe shitja e organeve, atëherë me këtë akuzë stepeshin të tjerët dhe shtronin çështjen e hetimit të problemit. Pra, gjithçka ishte e gatuar në Beograd. Sikundër aty është hartuar akuza kryesore se udhëheqësit e UÇK-së kanë drejtuar një organizatë kriminale. Ata kanë udhëhequr një luftë çlirimtare, si të gjitha ushtritë çlirimtare”, tha Berisha.
Ai dënoi dhe gjuhën jo etike ndaj Ramës.
“Në mënyrën më të padenjë, të turpshme, Edi Rama përdori çdo fjalor, që nuk mund ta përdorë kurrë një zyrtar para kamerave, në prani të një kolektiviteti, por në prani të askujt. E bëri këtë për dy arsye. Së pari, për të mbuluar refuzimin e pranimit nga ana e tij të rezolutës për dënimin e gjenocidit serb në Kosovë. Vasali i Vuçiçit nuk guxon që të ngrejë çështje siç duhet. Aty ku preket Serbia. Ai e ka me borxh, me një gjuhë jashtëzakonisht të padenjë për një njeri normal. Me këtë rast e përgëzoj zonjën Grida Duma për përgjigjen e merituar që i dha. Shpreh mosaprovimin tim për qëndrimin e kryetares së parlamentit ndaj atyre zonjave, kur dëgjuan kreun e tyre të flasë si halabak. Që nuk kërkuan ndërprerjen e seancës dhe nxjerrjen e tij jashtë. Nuk shqipëroi një fjalë”, tha Berisha.
Ai shtoi se Rama sponsorizoi një fushatë kundër Gjykatës së Hagës, duke dëshmuar jo solidaritet me udhëheqjen politike të Kosovës, por vullnetin e keq për të fshehur nëse kishin ndodhur krime, në një kohë kur Kosova e kishte votuar gjykatën.
“Ajo ishte një seancë për të mbuluar gjithashtu implikimin direkt të Edi Ramës në procesin e arrestimit të udhëheqjes politike të Kosovës. Pse, do thoni ju? Sepse duke pretenduar të bëhet lider rajonal dhe global, ky lidhi proceset në mënyrë fatale. Procesin e Hagës me atë të ndryshimit të kufijve. Nëse kontrolloni kronikat, do gjeni atë duke deklaruar se ajo gjykatë nuk na duhet gjë. Rama sponsorizoi një fushatë kundër Gjykatës së Hagës, duke dëshmuar jo solidaritet me udhëheqjen politike të Kosovës, por vullnetin e keq për të fshehur nëse kishin ndodhur krime, në një kohë kur Kosova e kishte votuar gjykatën. Këto janë motivet e vërteta që e shtynë Ramën në atë seancë të turpshme si ajo e djeshmja. Ai aty doli i vërtetë siç është. Një vasal mjeran i Vuçiçit”, deklaroi Berisha.
