Pesëmbëdhjetë deputetë të Partisë Demokratike kërkojnë shkarkimin nga detyra të kryebashkiakut socialist të Divjakës, Fredi Kokoneshi.
Në një shkresë drejtuar Prokurorit të Përgjithshëm Olsian Çela, kërkohet verifikimi i të dhënave të deklaruara nga Kokoneshi në formularin e vetdeklarimit.
Sipas PD-së, kryebashkiaku socialist duhet të humbë mandatin në kuadër të ligjit për dekriminalizimin, nëse vërtetohen akuzat se ka qenë i dënuar nga autoritetet italiane për vepra penale që lidhen me trafikun e qenieve njerëzore dhe prostitucionin.
“Nga të dhëna të bëra publike më parë, ekziston dyshimi i arsyeshëm se subjekti Fredi Kokoneshi, ndodhet në kushtet e ndalimit për të kandiduar dhe për t’u zgjedhur ne një funksion të lartë publik, në kuptim te nenit 2 te ligjit nr. 138/2015. Për këtë arsye, kërkojmë nga ana juaj që në zbatim të detyrimit të parashikuar nga neni 8 i këtij ligji, të bëni verifikimin përkatës. Kjo kërkesë e jona, bëhet në kushtet kur ekzistojnë të dhëna dhe dëshmi publike, se subjekti Fredi Kokoneshi, ka kryer veprimtari kriminale në Itali”, thuhet në shkresën drejtuar kryeprokurorit.
“Konkretisht, subjekti Fredi Kokoneshi, ka qenë në qytetin ë Milanos gjate viteve 1991-1997. Gjate këtij qëndrimi rezulton se është përfshirë edhe në një konflikt me shtetasin Fatos Korreshi dhe kushëriri i vet Landi Kokoneshi, të cilët kanë dijeni edhe për veprimtarinë e tij kriminale. Për shkak të këtij konllikti, subjekti Fredi Kokoneshi, ka qenë edhe në gjendje kome për rreth 20 ditë, në Magenta, një provincë pranë qytetit të Milanos. Gjithashtu, dijeni për këto fakte kane edhe shtetasit Shpëtim Bode nga Lushnja dhe Artan Mullai nga Divjaka. Denoncimi për veprimtarinë kriminalë të subjektit Fredi Kokoneshi, është bërë edhe nga ish-sekretari i Partisë Socialiste në zonën e Divjakës z. Berti Mone, që aktualisht ndodhet në France, ku ka fituar edhe azil. Konkretisht, z. Mone ka akuzuar subjektin Kokoneshi se në vitet 1995 — 1996, ka kryer trafik të qenieve njerëzore dhe veprimtari te paligjshme të lidhura me prostitucionin në Milano. Për pasojë, ai ka qenë i arrestuar nga Policia italiane dhe i dënuar me burg. Sipas dëshmisë se z.Mone, këto të dhëna i janë bërë më dije në vitin 2012 edhe Drejtorisë së Shërbimit Informativ Lushnje”, thuhet më tej në dokument.
