Ish-kryeministri dhe kryetari i PD Sali Berisha ka dalë në një konferencë për mediat, ku falenderoi vendet e Bashkimit Europian për vendimin e marrë mbi mbajtjen e konferencës së parë ndërqeveritare për hapjen e negociatave.
Berisha ka kërkuar që Rama të heqë dorë nga ligji për amnistinë fiskale, që sipas tij, është një provokim, që iu bëhet vendeve anëtare të Bashkimit Europian.
Po ashtu, Berisha theksoi se vendet e BE, një problem madhor kanë edhe eksportimin e krimit shqiptar në shtetet e tyre.
“Këto ditë, do të mbahet Konferenca e parë e Qeverisë Shqiptare me Komisionin Europian, akt që shënon hapjen e negociatave midis Shqipërisë dhe Bashkimit Europian, hapje që me terma konkrete ndodh në një kohë të dytë, pas konferencës së parë. Me këtë rast, në emër të Partisë Demokratike, e cila ka qenë dhe mbetet lokomotivëe proceseve të integrimit, shpreh mirënjohjen më të thellë dhe falenderimin më të përzemërt për Komisionin Europian dhe vëndet anëtare të BE-së për vendimin e tyre fisnik dhe miqësor ndaj Shqipërisë, aspiratave të shqiptarëve për integrimin e plotë të vendit të tyre në BE, si e ardhmja më e shkëlqyer e këtij vendi. Me këtë rast, siguroj BE-në, Komisionin dhe vëndet anëtare se, Partia Demokratike sot në opozitë do të mbështesë dhe nesër në pushtet do të ndërmarrë dhe miratojë çdo akt, vendim, ligj dhe reformë të nevojshme për avancimin e procesit të integrimit të vendit në BE”, tha Berisha nga selia blu.
“Unë, jam sot këtu gjithashtu për t’i kërkuar Edi Ramës, publikisht që në përgjigje të këtij vendimi fisnik të vëndeve anëtare dhe Komisionit Europian, të mos guxojë të provokojë partnerët tanë por të deklarojë menjëherë se, ai heq dorë përfundimisht nga ligji i aministisë fiskale, kundër të cilit është shprehur haptas Komisioni Europian; janë shprehur qartë dhe vende anëtare të BE, qoftë dhe me karriget bosh në takimin e tij të fundit; janë shprehur kundër edhe parnerët tanë jashtë BE-së; janë shprehur kundër Dhomat e Biznesit të SHBA, Gjermanisë, Francës, Turqisë dhe dhomat e biznesit shqiptar. Edi Rama duhet të kuptojë se problemi më madhor që vëndet anëtare të BE-së dhe partnerët tanë kanë me Shqipërinë është kriminaliteti shqiptar dhe eksportimi i tij në vendet të tjera. Legalizmi i parave të krimit të shqiptarëve është mesazhi më i keq që iu dërgohet këtyre vendeve, agjensive të tyre të zbatimit të ligjit dhe inkurajimi i madh për organizatat kriminale shqiptare. Nga ana tjetër, unë iu bëj thirrje qeverive të vëndeve anëtare dhe Komisionit Europian të insistojnë gjer në fund kundër miratimit të këtij ligji, që dëshmon lidhjet e tmerrshme të regjimit të Edi Ramës me organizatat kriminale brenda dhe jashtë vendit. Përndryshe, PD angazhohet para partnerëve tanë se, me të ardhur në pushtet ajo do të invalidojë aministinë fiskale e kriminale të Edi Ramës dhe do të vendosë para ligjit të gjithë personat që kanë përfituar nga kjo amnisti, duke u kërkuar origjinën e të ardhurave. Emrat e këtyre personave do t’u jepen një për një, po ashtu organeve fiskale e të drejtësisë së vendeve perëndimore që të përndiqen dhe atje nëse kanë eventualisht vendqëndrime në BE apo Britaninë e Madhe, SHBA, Kanada, etj. Si përfundim, edhe njëherë i shpreh mirënjohje BE së për hapjen e negocjatave, turp bukashkalit Edi Rama nëse ai nuk tërhiqet nga legalizimi i parave që mafia shqiptare ka grumbulluar kriminalisht jashtë dhe brenda vendit”, shtoi ai.
