Presidenti Ilir Meta me anë të një postimi në rrjetet sociale, shkruan mbi të dhënat e Eurostat, që kanë renditur Shqipërinë dhe Rusinë, si vendet me indeksin më të lartë të korrupsionit në kontinent.
Meta thekson se duhet që të bëhet luftë pa kompromis ndaj korrupsionit, që të çlirojmë Shqipërinë nga kapja që i është bërë vendit.
Postimi i Metës:
Një tjetër rekord i papranueshëm! Shqipëria rezulton vendi më i korruptuar në rajon dhe në Europë, duke lënë pas, sipas EUROSTAT, vetëm Rusinë.
Asnjë surprizë!
Mungesa e llogaridhënies në çdo nivel vendor dhe qendror, abuzimet me fondet publike nëpërmjet inceneratorëve, koncensioneve dhe PPP-ve, si dhe një drejtësi nën kontrollin e pushtetit, natyrshëm që do të sillte këto rezultate.
Vetëm lufta e hapur dhe pa kompromis kundër korrupsionit parandalon falimentimin e Shqipërisë dhe rikthen shpresën tek qytetarët, që në masë po detyrohen të braktisin Atdheun.
Çlirimi i Shqipërisë nga korrupsioni dhe kapja e shtetit është sot interesi dhe prioriteti ynë kombëtar!
