Kryetari i Grupit Parlamentar të Partisë Socialiste, Taulant Balla ka pritur në një takim këtë të mërkurë në Tiranë, deputetin e Bundestagut gjerman, Adis Ahmetoviç i cili është edhe raportuesi për Ballkanin Perëndimor.
Në konferencën e përbashkët për shtyp, Balla tha se nëse Parlamenti i Maqedonisë së Veriut miraton propozimin francez, javën e ardhshme mund të mbahet Konferenca e Parë Ndërqeveritare për të dyja vendet.
“Shpresojmë që gjatë kësaj jave do të gjendet ose do të plotësohet numri i duhur i mbështetjes në Parlamentin e Maqedonisë së Veriut, në mënyrë që javën e ardhshme, të hënën ose të martën, të jetë e mundur mbajtja e të dy konferencave ndër qeveritare, me Shqipërinë dhe me Maqedoninë e Veriut”, theksoi Balla.
Ndër të tjera, Balla deklaroi se me Ahmetoviç ka diskutuar për çështje të interesit të dyanshëm.
Ditën e nesërme, do të mbahet seancë parlamentare për diskutimin e propozimit francez në Maqedoninë e Veriut.
Deputeti gjerman Ahmetoviç shprehu mbështetjen për Kosovën, kërkoi hapjen e negociatave mes Maqedonisë së Veriut dhe Shqipërisë si dhe tha se Procesi i Berlinit këtë vit do të nis një proces ekonomik, gjë që sipas tij është sinjal i ri për Shqipërinë.
