Kreu demokrat, Sali Berisha, gjatë takimit me drejtuesit e degëve të PD në Tiranë, tha se Edi Rama është armik i votës së lirë, ndërsa kërkoi prej tyre që të qartësojnë çdo qytetar mbi rrezikun që Rama paraqet për ta dhe për Shqipërinë.
Berisha tha se nuk duhet lejuar që Edi Rama të shkelmojë arritjet e shqiptarëve në 30 vite dhe të kthejë kohërat e etërve të tij.
“Edi Rama pasi rrëmbeu votën donte të asgjesonte pluralizmin. Dhe bën lojën e turpit dhe atë primitive me pseudo-opozitën. Në këtë kontekst kjo është një betejë për jetë a vdekje për demokracinë shqiptare”, tha Berisha.
Duke iu rikthyer protestës së 7 korrikut, Berisha tha se në shesh zbriti opozita e vërtetë dhe kjo protestë ishte përcaktuese jo vetëm për PD dhe popullin opozitar, por edhe për pluralizmin në Shqipëri.
Ai tha se aspekti më i rëndësishëm i të gjitha aspekteve të tjera të kësaj proteste, ishte se për herë të parë prej vitesh, në shesh doli opozita e vërtetë.
“Dhe nëse më pyesni ju mua se çfarë ishte më e veçanta, më e rëndësishmja, më e jashtëzakonshmja, ishte opozita e vërtetë në shesh. Kjo përbën një ogur të madh të bardhë për Shqipërinë, në rrezik, për shpëtimin e saj”, shtoi ai.
Berisha tha se shpëtimi i Shqipërisë do të vijë nga PD, shoqëria civile dhe forcat e tjera opozitare. “Këta të cilët kanë ndërtuar kilometrin e rrugës Ibë-Farkë me 30 mln euro, aty vëllimet e punimeve nuk janë kurrë mbi 3-4 mln euro, këta kanë vjedhur dhe i kanë depozituar në emra të gjallë apo të vdekurish, pensionistash në azil etj etj. Edi Rama e ktheu vjedhjen e qytetarëve shqiptarë në sistem, i janë vërsulur me tërbim të gjitha pronave publike të vendit”, tha Berisha.
