Kryeministri Edi Rama tha nga Amsterdami, ku ndodhet në një vizitë zyrtare, se nisma rajonale “Ballkani i Hapur” do të ndihmojë, ndër të tjera, edhe Serbinë që të shkëputet nga Rusia dhe të pengojë influencën e kësaj të fundit në Beograd.
Në një konference të përbashkët për shtyp me kryeministrin holandez, Mark Rutte, Rama theksoi se Serbia nuk duhet të lënë në krah të Rusisë.
“Lidhur me Ballkanin e Hapur, kam folur me Markun dhe me udhëheqës të tjerë. Ballkani është pjesa më e cënueshme e zinxhirit që mund të preket dhe larg qoftë të thyhet si pasojë e luftës në Ukrainë dhe në anën lindore. Rusia ka një influencë të qartë brenda, ka disa lidhje tradicionale.
Ndaj, unë besoj se duhet ta marrim Serbinë me ne dhe mos ta lëmë të shkojë nga ana tjetër. Ballkani i Hapur ka ndihmuar e po kështu qëndrimi për t’i thënë gjërat, për të nxitur Serbinë të bëhet pjesë e të harmonizohet me sanksionet, por nga ana tjetër të kuptohet që ka nevojë për kohë, ky është qëndrimi i duhur”, tha ai.
