Për Edi Ramën, pyetjet që nuk i pëlqejnë atij janë shkelje etike.
Sipas asaj që shkruan Rama në një postim të gjatë në Twitter, për masat që merr duke dërguar gazetarë në ‘riedukim’, pasi i bëjnë pyetje që nuk i pëlqejnë, gazetarët duhet të sillen përballë tij veç si do ai dhe të bëjnë pyetjet që do ai.
Në postimin e tij, Rama shprehet se është tërhequr nga nisma ligjore për të censuruar mediat dhe pret që ambienti mediatik të vetërregullohet.
Në mesazhin e tij, Rama e thotë qartë që në konferencat e tij do të jenë të pranishëm vetëm gazetarët që i bëjnë pyetjet që i pëlqejnë atij. Kritikët nuk do të lejohen të marrin pjesë.
‘E përshëndes si shprehje lirie sulmin e disave,që në emër të lirisë së medias kërkojnë legjitimim për lirinë e shkeljes së normave etike deri brenda konferencave të mia për shtyp, sepse jashtë tyre tanimë kjo liri është e legjitimuar plotësisht! Por kërkesa s’mund të plotësohet.
Jemi tërhequr nga përpjekja për ta normuar ligjërisht lirinë e shpifjes dhe të fyerjes, që në epokën e rrjeteve sociale ka marrë përmasa katastrofike! Nuk e kemi bërë as nga frika, as nga presionet po si reagim konstruktiv ndaj kërkesës së komunitetit mediatik për vetërregullim.
Ku është vetërregullimi? Nejse, do ta presim pa shpresë se do vijë! Por ndërkohë nuk ka për të ndodhur që të legjitimohet liria e shkeljes së normave etike sy më sy në praninë time. E kam ndryshuar ka kohë qasjen time, jo se janë zhdukur kazanët po se kam reaguar ndaj kritikave.
Por ja që asgjë s’ka ndryshuar nga ana tjetër, përkundrazi, megjithëse asnjë gazetari e asnjë medieje nuk i ka hyrë asnjë gjemb në këmbë nga kjo qeveri dhe megjithëse disponimi ndaj pyetjeve e kërkesave për informacion ka qenë maksimal, janë shtuar shpifjet e është ulur rankimi!
Si përfundim: Shpifni, gënjeni, sajoni, shkruajeni e fliteni shqipen keq sa të doni, sepse askush nuk do t’ju thotë ‘plaç’, po mos prisni që dhe kur vini për të pyetur mua të ushtroni publikisht në mënyrë të përsëritur lirinë e shkeljes së etikës dhe përsëri të jeni të mirëseardhur!’, shkruan Rama në mesazhin e tij në Twitter.
