Deputeti socialist Pandeli Majko, duket se ka bërë sot një autokritikë për ndërhyrjet e politikës në veprimtarinë e SPAK.
Në mbledhjen e Komisionit të Ligjeve, Majko pranoi faktin se mazhoranca e ka kaluar cakun edhe pse qeveria nuk mund të akuzohet pse bën deklarata.
“Do t’ju lutesha që të kuptojmë dhe raportin e Kuvendit të Shqipërisë me strukturën e drejtësisë. Nuk është më ajo marrëdhënia që kemi pasur më parë, është një marrëdhënie krejtësisht tjetër. Kam përshtypjen që në momente të caktuara, dhe unë vetë jam i vetëdijshëm që e kemi kaluar pak cakun”, tha Majko.
Ndërkohë deputeti i Partisë Demokratike, Enkelejd Alibeaj, kërkoi të futet në draftin 2021 edhe propozimi që të ndalohet rreptësisht ndërhyrja e politikës në SPAK.
“Përfaqësues të lartë politikë në një seri eventesh politiko-partiake kanë lëshuar sinjale të qarta publike për të ndërhyrë në veprimtarinë e SPAK-ut”, tha ai.
Në Komisionin e Ligjeve u konstatua se institucionet e drejtësisë përplasen mes tyre sikur të mos kishin marrëdhënie me njëra-tjetrën. Sipas deputetëve, kjo u konstatua nga deklaratat e vetë drejtuesve të institucioneve, ku duket se marrëdhëniet institucionale mes Prokurorit të Përgjithshëm, KLP, ILD veçanërisht por edhe me vetë KLGJ, paraqiteshin problematike.
