Policia e Durrësit ka goditur dy raste të mbajtjes pa leje të armëve të zjarrit, duke arrestuar tre persona dhe sekuestruar armë, municion luftarak, granatë dhe lëndë narkotike.
Gjatë operacionit u arrestuan shtetasit L. D. dhe A. M., të dy banues në Lezhë.
Ata u ndaluan në hyrje të qytetit të Durrësit, ndërsa lëviznin me automjet dhe dyshohet se po transportonin një armë zjarri me qëllim shitjen e saj.
Nga kontrolli i ushtruar, policia gjeti në çantën e pasagjerit L. D. një pistoletë me dy krehra dhe fishekë.
Po ashtu, këtij shtetasi iu gjet edhe një sasi e vogël lënde e dyshuar narkotike Cannabis Sativa.
Në një rast tjetër, uniformat blu arrestuan shtetasin D. T., banues në fshatin Shtrazë të Shijakut.
Gjatë kontrollit në banesën e tij u sekuestruan një armë zjarri tip kallashnikov, një granatë mbrojtëse me ndezës të montuar, një krehër arme dhe qindra fishekë luftarakë, të cilat posedoheshin pa leje.
