Pas denoncimit, grupi i Fiks Fare shkoi në terren për të verifikuar situatën. Në zonën ku lumi Shkumbin derdhet në det, mes kallamishteve dhe mbetjeve të shumta plastike, u konstatuan shiringa, age, ampula, shishe të vogla medikamentesh dhe paketime të ndryshme ilaçesh. Mes mbetjeve të gjetura kishte edhe produkte mjekësore si nafazolinë dhe insulinë.
Mbetjet nuk ishin të përqendruara në një pikë të vetme, por të shpërndara përgjatë një sipërfaqeje të konsiderueshme bregdetare. Kjo ngre dyshime se ato mund të jenë transportuar nga rrjedha e lumit Shkumbin dhe më pas të jenë depozituar në grykëderdhje. Megjithatë, burimi i saktë i tyre mbetet ende i paidentifikuar.
Situata konsiderohet shqetësuese edhe për faktin se shumë pranë kësaj zone ndodhet plazhi i Vilbashtovës, i frekuentuar gjatë sezonit veror nga pushues vendas dhe turistë të huaj. Gjatë xhirimeve të Fiks Fare, pranë bregut ku ndodheshin mbetjet u panë vizitorë që shëtisnin dhe pushonin në zonë.
Për këtë problem, gazetarët iu drejtuan Bashkisë Rrogozhinë. Fillimisht ata kontaktuan drejtoreshën e Qendrës Shëndetësore në Gosë, e cila deklaroi se nuk mund të përcaktojë origjinën e mbetjeve të gjetura, por siguroi se qendrat shëndetësore nën administrimin e saj zbatojnë procedurat ligjore për trajtimin e mbetjeve spitalore.
Sipas saj, institucioni ka kontratë me një kompani të specializuar që i tërheq këto mbetje çdo javë, ndërsa qendra shëndetësore më e afërt me zonën ndodhet rreth katër kilometra larg rrjedhës së lumit Shkumbin.
Më pas, Fiks Fare iu drejtua sërish Bashkisë Rrogozhinë. Punonjësja e zyrës së informacionit konfirmoi se bashkia është në dijeni të problematikës dhe se për këtë çështje janë dërguar shkresa zyrtare drejt Bashkisë Elbasan dhe Bashkisë Librazhd, pasi lumi Shkumbin përshkon këto territore përpara se të derdhet në det.
Në një reagim për Fiks Fare, Drejtori i Drejtorisë së Arsimit, Turizmit dhe Sportit në Bashkinë Rrogozhinë, Orges Tosku, deklaroi se ndotja e grykëderdhjes së Shkumbinit është një problem që vazhdon prej vitesh. Sipas tij, bashkia ka njoftuar vazhdimisht institucionet vendore dhe qendrore për mbetjet që transportohen nga lumi, por ende nuk janë siguruar fondet e nevojshme për një zgjidhje afatgjatë.
Ai tha se bashkia ka organizuar disa aksione pastrimi në bashkëpunim me shkollat dhe ushtrinë, ku aksioni i fundit është zhvilluar në muajin mars. Megjithatë, sipas tij, mbetjet rikthehen vazhdimisht pasi transportohen nga rrjedha e lumit.
Përfaqësuesi i bashkisë shtoi se në zonë gjenden jo vetëm mbetje plastike, por edhe mbetje spitalore, qelqe dhe madje kafshë të ngordhura. Ai theksoi se aktualisht e vetmja mundësi mbetet organizimi i aksioneve të tjera pastruese, duke pranuar se kjo nuk përbën një zgjidhje përfundimtare të problemit.
Ndërkohë, mbetjet spitalore vijojnë të qëndrojnë pranë vijës bregdetare, duke ngritur pikëpyetje serioze mbi sigurinë mjedisore dhe shëndetin publik në një zonë të frekuentuar nga pushuesit./TCH
