Kryeministri Edi Rama ka reaguar sërish lidhur me protestat kundër projektit të planifikuar në zonën e Zvërnecit, duke sulmuar ashpër protestuesit dhe duke mbrojtur vizionin e qeverisë për zhvillimin turistik të zonës.
Në dy postime të gjata në rrjetet sociale, Rama kritikoi protestuesit dhe komentuesit që, sipas tij, përdorin gjuhë fyese dhe nuk ofrojnë argumente për debatin publik.
“Lërini ambientalistët e vërtetë në punën e në të drejtën e tyre të protestës, lërini mbrojtësit dhe dashamirët e vërtetë të natyrës në punën e në të drejtën e tyre të protestës, lërini në të drejtën e tyre edhe qytetarët e shqetësuar, po patjetër lërini në rehatin dhe ngjyrën e tyre edhe flamingot”, shkroi Rama.
Kryeministri tha se nuk ka asnjë problem me protestën si e drejtë demokratike, por akuzoi një pjesë të kundërshtarëve të projektit për përdorimin e gjuhës së urrejtjes në rrjetet sociale. Madje, ai me ironi u shpreh se sharjet dhe mallkimet në drejtim të tij nga protestuesit, i bëhen shëndet.
“Merruni me mua sa të doni, se mua vetëm shëndet dhe vullnet më bëhen sharjet e mallkimet tuaja, po boll e ndotët tërë mexhelisin shqipfolës të rrjeteve sociale me fjalorin tuaj me 40 fjalë ku 20 janë sharje e pisllëk”, u shpreh ai.
