Prokuroria e Posaçme Kundër Korrupsionit dhe Krimit të Organizuar (SPAK) dhe Drejtoria Distriktuale Antimafia e Barit (DDA) kanë zhvilluar një operacion të përbashkët në kuadër të së cilit është goditur një grup kriminal, i përfshirë në trafik droge, pastrim parash dhe vrasje.
Sipas organit të akuzës, hetimet u përqëndruan në zbulimin e vrasjes së Francesco Diviesti-t, ngjarje e ndodhur më 25 Prill të vitit 2025, në Canosa di Puglia, ku u zbulua dhe grupi kriminal i drejtuar nga shtetasi Igli Kamberi.
Në kuadër të këtij operacioni janë lëshuar në total 15 masa sigurimi, nga të cilat 10 ‘arrest me burg’ prej të cilave 6 të ekzekutuara në Itali dhe 4 në Shqipëri, 1 ‘arrest shtëpie’ dhe 3 ‘detyrim paraqitje’.
Masa e sigurisë i është komunikuar në Itali kreut të grupit kriminal Igli Kamberit, i arrestuar në Korrik 2025, i akuzuar ndër të tjera për vrasjen e një 26-vjeçari në Berletta të Italisë në vitin 2025.
Ishin hetimet për këtë vrasje që çuan në zbulimin e këtij rrjeti kriminal dhe aktivitetit të pastrimit të parave, të cilat nga Italia i sillnin në Shqipëri me mjete të ndryshme transporti. Në 2024-ën, në pikën kufitare të Muriqanit janë sekuestruar mbi 680 mijë euro, teksa po tentohej futja e tyre në Shqipëri me një automjet, të dyshuara se i përkasin pikërisht këtij grupi kriminal.
Në Shqipëri është arrestuar po ashtu shtetasi Ergys Kastrati alias Bishja, i cili prej 2 vitesh është shpallur në kërkim ndërkombëtar nga autoritetet italiane, gruaja e tij Desmira Ceco dhe 2 shoferë që bënin transportin e parave të pista. Bishja u arrestua në një vilë pranë TEG-ut.
Akuzat
Sipas organit të akuzës të dyshuarit akuzohen për vrasje me paramendim me metoda mafioze, Trafik ndërkombëtar droge, Tentativë zhvatjeje, Mbajtje pa leje të armëve, Favorizim të autorëve të krimit, Shkelje të masave të siguris dhe Pastrim ndërkombëtar parash.
Ekzekutimi i berberit Francesco Diviesti-t – 25 Prill 2025
Hetimet zbuluan se në mbrëmjen e datës 25 Prill 2025, Francesco Diviesti u përfshi në një konflikt, në një bar të Barletta-s dhe u dërgua brenda disa shpellave, pranë një zonë të izoluar në Murgia-n e sipërme, në Casosa di Puglia, ku është qëlluar 5 herë nga dy pistoleta dhe më pas, i është vënë flaka brenda disa gomave, me qëllim që kufoma të digjej, sipas një metode të përdorur në vitet ’90, në këtë zonë.
Duke iu referuar kësaj mënyre të ekzekutimi, hetimi u mor përsipër nga Drejtoria Antimafia e Barit, duke lokalizuar kufomën brenda katër ditëve.
Më 25 Qershor, shtetasi shqiptar i përfshirë në krim, Igli Kamberi i cili ishte larguar dy ditë pas ekzekutimit të Diviesti-t, u arrestua në qytetin Roshe të Hungarisë, jo për vrasje, por për posedim të 24 kilogramëve kokainë të pastër, në kuadër të procedimit të Prokurorisë së Tranit. Drejtoria Antimafia e Barit i kishte dërguar provat kësaj Prokurorie për të bërë të mundur arrestimin e tij për këtë krim. Në të njëjtën kohë, tek familjarë të tij u sekuestruan mbi 412.000 euro ‘cash’ si dhe u dokumentua përfshirja e tre shtetasve italianë në këtë çështje penale në hetim.
Sekuestrohen para, kompani dhe pasuri
Në kuadër të këtij operacioni janë sekuestruar katër shoqëri tregtare, tetë llogari bankare dhe tetë automjete. Shoqëritë e vendosura nën sekuestro janë “Fermer Fatos Buzi”, “Igli Kamberi”, “Auto Rend&Sell – Albania” dhe “Lefter Nelaj”.
Dy prej llogarive bankare të sekuestruara rezultojnë në emër të bashkëshortes së Ergys Kastratit, Desmira Ceco. Dy llogari të tjera janë në emër të bashkëshortes së Igli Kamberit, Nevila Kamberi, si edhe të nënës së saj, Dituri Buzi. Ndërkohë, babait të kësaj të fundit, Fatos Buzi, i është sekuestruar shoqëria “Fermer Fatos Buzi”.
Igli Kamberit, i konsideruar si drejtuesi i grupit kriminal, i është vendosur në sekuestro edhe shoqëria tregtare që mban emrin e tij, “Igli Kamberi”. Ndërsa kompania “Auto Rend&Sell – Albania”, e sekuestruar po ashtu nga SPAK, rezulton në pronësi të Bardhok Gjergjit, të cilit i janë sekuestruar edhe pesë automjete dhe një llogari bankare.
Dy llogari të tjera bankare të sekuestruara janë në emër të Saimir Pirrës, si edhe një automjet. Ndërkohë, Lefter Nelajt i është sekuestruar kompania “Lefter Nelaj”, së bashku me një llogari bankare. Në sekuestro janë vendosur gjithashtu edhe dy automjete në pronësi të Edi Brahajt.
Lista e pasurive të sekuestruara:
Desmira Ceco (bashkëshortja e Ergys Kastratit)
-Dy llogari bankare
Nevila Kamberi (bashkëshortja e Igli Kamberit) dhe Dituri Buzi (e ëma)
-Dy llogari bankare
Fatos Buzi (babai i Nevila Kamberit)
-Shoqëria “Fermer Fatos Buzi”
Igli Kamberi
-Shoqëria tregtare “Igli Kamberi”, person fizik
Bardhok Gjergji
-Shoqëria “Auto Rend&Sell – Albania”
-5 automjete dhe 1 llogari bankare
Saimir Pirra
-Dy llogari bankare e 1 automjet
Lefter Nelaj
-Shoqëria “Lefter Nelaj” person fizik
-Një llogari bankare
Edi Brahaj
-Dy automjete
Sipas organit të akuzës, procedimi për operacionin e mësipërm ndodhet ende në fazën e hetimeve paraprake.
