Deputeti demokrat, Klevis Balliu, akuzoi qeverinë për mungesë transparence lidhur me projektin “Porta e Alpeve” dhe kërkesën për një hua prej 100 milionë eurosh.
Nga foltorja e Kuvendit, Balliu deklaroi se qeveria, sipas tij, ka “shpopulluar veriun” për 14 vite me radhë dhe tashmë po përdor propagandën për të justifikuar marrjen e një tjetër borxhi publik. Ai kritikoi mungesën e informacionit konkret mbi investimet që do të realizohen në kuadër të projektit, duke theksuar se nuk janë bërë publike projektet, kostot apo destinacioni i fondeve.
Sipas deputetit demokrat, qeveria po kërkon fillimisht marrjen e borxhit dhe vetëm më pas vendosjen e mënyrës së shpenzimit të parave, gjë që ai e cilësoi si “recetë klasike të abuzimit me fondet publike”.
Balliu tha se fondet rrezikojnë të përdoren për interesa personale dhe jo për zhvillimin e veriut të vendit.
Balliu: Qeveria që për 14 vite me radhë ka shpopulluar veriun, sot vjen me propagandën e radhës duke kërkuar edhe 100 milionë euro hua për atë që këta e quajnë si “Porta e Alpeve”. Por Alpet i gjejnë në Lezhë, e nuk i gjejnë në Tropojë, e nuk i gjejnë atje ku janë, por i gjejnë atje ku duan. Në pamje të parë, mund të duket se ky është një projekt pozitiv. Problemi qëndron tek fakti se qeveria refuzon të bëjë edhe transparencën më elementare mbi mënyrën se si do të përdoren këto para. Kur kërkojmë të dimë se cilat janë projektet konkrete, sa kushton secili investim dhe ku do të shkojnë fondet, qeveria nuk jep asnjë përgjigje.
Dhe e pamë sot këtu me ministrin që, pavarësisht pyetjeve të shumta të kolegëve, nuk thonte asnjë përgjigje. Pra, qeveria thotë, të marrim fillimisht borxhin dhe më pas të vendosim se ku do t’i shpenzojmë paratë. Kjo nuk është qeverisje. Kjo është receta klasike e abuzimit me fondet publike, sepse këta nuk kanë projekte për Shkodrën apo veriun në tërësi, këta kanë projekte vetëm për xhepat e tyre. T’i besosh kësaj qeverie qindra miliona euro pa asnjë plan të qartë, pa asnjë projekt, është njësoj si t’i hapësh derën hajdutit dhe të presësh që ai mos të vjedhë. Propaganda e pështirë se kjo qeveri paska hallin e veriut është absurde. Këta e kanë braktisur veriun, e kanë varfëruar dhe e kanë detyruar të largohet masivisht. Pas 14 vitesh në pushtet, çfarë kanë sjellë në veri?
Asgjë tjetër përveç varfërisë, dhimbjes dhe emigrimit. Porta e Alpeve rrezikon të jetë thjesht porta e re e vjedhjes. Sa herë kjo qeveri flet për projekte strategjike, qytetarët kanë çdo arsye të alarmohen, sepse historia ka treguar se pas propagandës fshihet skema e radhës e abuzimit. Dhe fatkeqësisht, kjo gjë ka ndodhur në mënyrë të përsëritur. Mjafton të kujtojmë farsën e 100 fshatrave, ku për propagandë u kërkuan qindra miliona euro investime dhe sot nuk ka mbetur asgjë. Dhe fatkeqësisht do të ndodhë ajo që ka ndodhur gjithmonë. Paratë do të zhduken, ndërsa qytetarët do të mbeten me borxhet për t’i shlyer, me taksat e tyre që do t’i rrisin në vijim përsëri e njëjta qeveri. Njësoj do të zhduken fondet që po i merren Bankës Evropiane për Investime, siç u zhdukën fondet e IPARD-it, për të gjithë ata që na flasin se janë fonde të rëndësishme.
Kjo qeveri nuk ka pyetur se nga vijnë fondet. Kjo qeveri ka dashur t’i vjedhë fondet. Se vijnë nga Evropa, se vijnë nga Amerika, se vijnë nga kudo, se vijnë nga taksat e xhepat e qytetarëve shqiptarë, me një projekt apo një tjetër, këta kanë talentin e jashtëzakonshëm për të shpikur skema vjedhje të pafundme. Por nuk gjejnë asnjë minutë kohë për t’u marrë me hallet e qytetarëve. Së dyti, më duhet të ndalem sot në një çështje që nuk ka lidhje me këtë diskutim.
