Partia Demokratike e Kosovës ka prezantuar listën me 110 kandidatë për zgjedhjet e 7 qershorit, ku më shumë se gjysma e emrave janë prurje të reja.
Kryetari Bedri Hamza, i cili prin listën i ndjekur nga Uran Ismaili dhe Vlora Çitaku, i ka vlerësuar kandidatët si profesionistë të dëshmuar në shërbim të qytetarëve. Sipas tij, ky ekip përfaqëson besimin se Kosova meriton një qeverisje më të mirë dhe më cilësore.
“Kjo është lista jonë. Profesionistë të dëshmuar në punë, në angazhim publik dhe në shërbim ndaj qytetarëve. Në këtë listë ka energji të re, por edhe përvojë. Njerëz që besojnë se Kosova meriton më shumë dhe më mirë. Mbi 50% e listës së kandidatëve janë prurje të reja, si pjesë e përkushtimit të PDK-së për t’u dhënë hapësirë kuadrove të rinj.
Përveç listës, në ditët në vijim PDK do ta prezantojë edhe programin më serioz dhe më të përgjegjshëm për shtetin dhe qytetarët. Më 7 qershor, ju do ta keni edhe një mundësi për të vendosur për të ardhmen e vendit, ndërsa thirrja ime është e përzemërt: Besoni në Kosovë”, shkruan Hamza.
