Kreu i Partisë Demokratike, Sali Berisha, ka akuzuar kryeministrin Edi Rama se po mban peng procesin e integrimit, teksa e ka cilësuar qeverinë si një organizatë kriminale që vepron kundër interesave të qytetarëve shqiptarë.
Në një deklaratë për mediat, Berisha u shpreh se çdo ditë po bëhet më e qartë, sipas tij, se Rama përfaqëson një pengesë serioze për të ardhmen europiane të vendit.
Ai iu referua edhe një komenti të publicistit amerikan Michael Rubin, i cili sipas Berishës e ka cilësuar Ramën si një “gangrenë që duhet hequr sa më parë”.
Sipas Berishës, procesi i integrimit europian bie ndesh me interesat e qeverisë aktuale, pasi kërkon respektim të ligjit, votës së lirë, të drejtave themelore dhe funksionimin e ekonomisë së tregut.
Ai akuzoi qeverinë për lidhje me krimin dhe korrupsionin, ndërsa theksoi se opozita do të vazhdojë të rezistojë ndaj çdo përpjekjeje, që sipas tij synon izolimin dhe largimin e Shqipërisë nga rruga europiane.
Berisha: Çdo ditë e më shumë bëhet botërisht e qartë se Edi Rama është një gangrenë siç shprehet sot një publicist i mirënjohur për të, Michael Rubin, një gangrenë që duhet hequr sa më parë.
Në këtë kuadër, mendoj se opozita në kushte të një narkodiktature, po qëndron fuqishëm si zëri i vërtetë i shqiptarëve që besojnë tek vlerat e lirisë, që shpresojnë të kenë një të ardhme që meritojnë dhe këtë të ardhme më të mirë është e ardhmja në BE.
Nuk ka projekt më të shkëlqyer për Shqipërinë dhe kombin se sa vendosja e Shqipërisë në këtë komunitet ashtu siç e projektonin rilindësit tanë, zonjë midis vendeve të tjera të Evropës.
Por ky proces, siç faktohet çdo ditë e më shumë, është marrë peng nga një organizatë kriminale që drejton Shqipërinë, me kreun e saj të Meduzës, Edi Ramën.
Shqiptarët duhet ta dinë se këta nuk kanë absolutisht asnjë interes për të ardhmen e tyre, përveçse për të ardhmen e vet dhe parajsën e tyre dhe të fëmijëve të tyre me paratë e qytetarëve shqiptarë.
Për ta, integrimi evropian është një proces krejtësisht i padëshirueshëm sepse ky proces ka disa rregulla, ligje, standarde që përparësojnë interesat e qytetarëve shqiptarë dhe nuk pranon qeveritarët hajdutë, nuk pranon lidhjet me krimin të qeveritarëve.
Ky proces kërkon respektimin e lirive dhe të drejtave themelore, të votës së lirë të shqiptarëve, por edhe funksionimin e ekonomisë së tregut dhe rregullave të tregut.
Opozita ka zgjedhur në këto kushte të qëndrojë e pamposhtur si zëri i ndërgjegjes së këtij kombi, që kërkojnë me çdo kusht ta izolojnë, ta poshtërojnë dhe ta largojnë nga rruga e integrimit.
