Banorët e rrugës “Agush Gjergjevica”, rreth 100 metra larg Unazës së Madhe dhe pranë Kryegjyshatës Botërore në Tiranë, kané ngritur shqetësimin e tyre për praninë e mbeturinave inerte që prej më shumë se 3 muajsh janë “harruar” në këtë zonë.
Sipas denoncimit të mbërritur në redaksinë e JOQ, në anë të rrugës janë grumbulluar copa betoni dhe mbetje ndërtimi, të cilat jo vetëm prishin pamjen e zonës, por po kthehen edhe në shqetësim për banorët dhe kalimtarët.
Banorët thonë se kanë bërë vazhdimisht ankesa pranë institucioneve përgjegjëse, por deri më tani nuk është marrë asnjë masë konkrete për pastrimin e tyre. Sipas tyre, përgjigjja që kanë marrë është se nuk ka makineri të disponueshme për t’i larguar mbetjet.
“Janë prej 3 muajsh këtu. Kemi bërë ankesa dhe na thonë se s’kanë makineri, s’kanë me çfarë t’i heqin”, shprehen banorët për JOQ.
Ata kërkojnë ndërhyrje të menjëhershme nga autoritetet përkatëse për pastrimin e zonës dhe marrjen e masave që situata të mos përsëritet më.
