Prokuroria e Shkodrës ka përfunduar hetimet dhe ka dërguar për gjykim katër shtetas të akuzuar për pastrim parash.
Bëhet fjalët për shtetasit Arsuel Curaj, Alma Guraj, Gëzim Guraj dhe Vladimir Jacaj.
Sipas hetimeve, të pandehurit kanë vepruar në bashkëpunim duke kryer kontrata fiktive për shkëmbime pronash, dhurime dhe shitje, si dhe veprime bankare të simuluara.
Qëllimi i këtyre transaksioneve ka qenë pastrimi i produkteve të veprës penale në një shumë të konsiderueshme prej 500 mijë euro.
Prokuroria ka arritur të provojë se veprimet e kryera përbëjnë elementët e veprës penale “Pastrimi i produkteve të veprës penale ose veprimtarisë kriminale” me pasoja të rënda, të parashikuar nga neni 287/3 i Kodit Penal.
Shuma e përfshirë në këtë aktivitet kriminal është sekuestruar nga organi i akuzës.
Dosja tashmë i kalon Gjykatës së Shkallës së Parë të Juridiksionit të Përgjithshëm Shkodër, e cila do të vendosë mbi përgjegjësinë penale të të akuzuarve.
