SPAK ka përfunduar hetimet dhe ka dërguar për gjykim dy detyrë inspektorët e Inspektoratit Shtetëror Teknik Industrial si edhe administratorin e një biznesi privat, të cilët akuzohen për korrupsion.
Në qendër të dosjes janë tre të pandehur: Julian Suljoti, administrator i subjektit privat “Ansoil sh.a”, i akuzuar për korrupsion aktiv të personave që ushtrojnë funksione publike; Olsi Jarazi, inspektor pranë Inspektoratit Shtetëror Teknik Industrial (ISHTI), i akuzuar për korrupsion pasiv në bashkëpunim; si dhe Luan Sadikaj, ish-inspektor i ISHTI-t, i akuzuar për të njëjtën vepër penale.
Sipas hetimeve të kryera nga Byroja Kombëtare e Hetimit (BKH), më 1 nëntor 2021, inspektorët Olsi Jarazi dhe Luan Sadikaj kanë marrë nga administratori Julian Suljoti një shumë prej 900 mijë lekësh dhe 10 mijë dollarësh.
Pagesa dyshohet se është bërë për të shmangur ndëshkimin administrativ ndaj subjektit privat, i cili ushtronte aktivitetin tregtar pa dokumentacionin e nevojshëm tekniko-ligjor dhe pa licencën përkatëse.
Procedimi penal fillimisht ishte regjistruar në Prokurorinë pranë Gjykatës së Shkallës së Parë të Juridiksionit të Përgjithshëm Korçë, me nr. 385/1 të vitit 2023, për veprat penale të korrupsionit aktiv dhe pasiv të personave që ushtrojnë funksione publike, kryer në bashkëpunim.
Më pas, dosja u transferua për kompetencë në SPAK, që tashmë ka dërguar çështjen për gjykim.
