Një atentat me armë zjarri është regjistruar pasditen e kësaj të diele në Balldren të Lezhës.
Një 39 vjeçar i identifikuar si Kreshnik Mujeci është ekzekutuar me armë zjarri brenda në makinë, bashkë me bashkëshorten e tij, G. M., 32 vjeçe.
Sipas informacioneve paraprake, Mujeci ishte duke udhëtuar me një automjet tip “Audi Q7” në aksin Balldren-Torovicë, kur persona ende të paidentifikuar, i kanë zënë në pritë dhe kanë hapur zjarr drejt tyre, duke i lënë të vdekur brenda makinës, burrë e grua.
Siç mund të shihet edhe në pamjet e regjistruara nga vendngjarja, duket se është qëlluar me breshëri plumbash në anën e majtë të shoferit dhe të pasagjerit.
Pasi kanë qëlluar drejt tyre, autorët dyshohet se janë larguar drejt Torovicës, ndërsa një grup hetimor është ngritur për zbardhjen e plotë të rrethanave të ngjarjes si dhe identifikim dhe kapjen e autorëve.
Motivet e ngjarjes janë ende të paqarta, ndërsa nuk përjashtohet pista e hakmarrjes, pasi viktima Kreshnik Mujeci, rezulton i akuzuar për vrasje në vitin 2016.
Kush është Kreshnik Mujeci, e shkuara e errët
Kreshnik Mujeci rezulton një emër i dëgjuar për policinë. Në vitin 2017, ai dhe vëllai i tij u arrestuan si të dyshuar për vrasjen e Gegë Mëhillit, i njohur edhe si Gent Pjetri.
Sipas hetimeve të asaj kohe, vëllezërit, në bashkëpunim me një vëlla të tretë, i kishin prerë rrugën viktimës në aksin Shkodër–Velipojë dhe e kishin qëlluar për vdekje pas një konflikti të ndodhur një ditë më parë.
Një ditë pas krimit u arrestua Jozef Mujeci, ndërsa dy vëllezërit e tjerë u vunë në pranga një vit më vonë, në operacionin e koduar “One Year”.
Deri më tani pista e hakmarrjes është pista kryesore ku po heton policia, megjithatë nuk mund të përjashtohet edhe pista për larje hesapesh të tjera.
Kreu i Policisë së Lezhës, Arben Nasufi, në një prononcim për mediat, ka deklaruar se mjeti është qëlluar me breshëri plumbash në lëvizje, ndërsa sipas tij, policia ka nisur hetimet për zbardhjen e plotë të rastit.
