Me direktivë të kryeministrit Edi Rama, maxhoranca rrëzoi sot në Konferencën e Kryetarëve kërkesat e opozitës për krijimin e dy Komisioneve Hetimore parlamentare. Opozita kërkoi ngritjen e një Komisioni për kontrollin e ligjshmërisë së veprimeve të AKSHI-t dhe për tenderat e ndërtimit të rrugëve.
Gazmend Bardhi, kreu i grupit parlamentar të Partisë Demokratike, gjatë Konferencë së Kryetarëve akuzoi sot mazhorancën se po pengon funksionimin e Parlamentit dhe po injoron rolin e opozitës.
Në një debat të fortë me kryetarin Niko Peleshi, Bardhi theksoi se kërkesat e opozitës rrëzohen për “urrejtje politike” dhe nuk ka hapësirë për komisione hetimore, interpelanca apo mocione me debat.
Fjala e plotë e Bardhit:
Nëse kërkesat e opozitës rrëzohen nga urrejtja politike, ky nuk është parlamentarizëm. Prandaj po ju pyes, kryetar, cili është roli i deputetëve, kur ju nuk pranoni as komisione hetimore, as interpelanca, as mocione me debat, as amendamente, as ligje? Cili është roli i opozitës? T’ju bëjë fresk juve?
Na thoni cili është roli ynë. Sepse na thoni ‘hajde të bashkëpunojmë’ dhe ‘të jemi konstruktivë’, por kur ne e bëjmë këtë, ju rrëzoni gjithçka. Ju, kryetar, jeni garant për funksionimin e Kuvendit. Na keni lexuar një fjalim që na ka prekur, ndërsa sot nuk gjej asnjë çështje që ju, si kryetar, e keni mbrojtur për opozitën.
