Kryedemokrati, Sali Berisha ka reaguar për çmimin e lartë të naftës në Shqipëri, duke e cilësuar atë si një ndëshkim për qytetarët dhe ekonominë e vendit.
Ai thekson se rreth 350 mijë ton naftë kontrabandë zhduken çdo vit, dhe se përgjegjëse për këtë është vetë qeveria.
Sipas Berishës, çmimi i lartë i naftës bazohet në dy faktorë kryesorë, ngarkesën fiskale më të lartë në botë dhe kontrabandën e kontrolluar nga shteti.
Ai argumenton se 60% e çmimit për çdo litër nafte përbëhet nga taksat dhe akciza që qeveria merr direkt nga qytetarët, duke e bërë koston e jetesës për shqiptarët shumë më të lartë se në vendet e tjera europiane.
Berisha thekson se për një shqiptar, çmimi i naftës përbën 7.2% të të ardhurave ditore, ndërsa në Gjermani është vetëm 1.2% dhe në Zvicër rreth 1%. Ai shton se krahasuar me fuqinë blerëse, çmimi i naftës në Shqipëri është më i larti në Europë dhe në botë.
Berisha kritikon qeverinë për sharlatanizëm ekstrem dhe për manipulimin e çmimeve, duke theksuar se ngarkesa fiskale dhe kontrabanda janë përgjegjësit kryesorë të krizës së naftës, e cila rrit çmimet e transportit, të ushqimeve dhe të mjeteve të punës për fermerët.
“Nuk zhduket nafta transit, por zhduken 350 mijë ton naftë kontrabandë. Dhe kontrabandën nuk mund ta bëjë njeri tjetër përveç qeverisë. Nafta e tëra vjen me anije. Dhe është vërtetuar se anijet e Libisë vijnë për qeverinë. Është gjetur. Po ato vijnë, kapen dhe mbyllen se janë anijet e qeverisë. Nafta, në qoftë se ti e taton 60 përqind të çmimit litrin, ti faktikisht bë një plaçkitje masive të shqiptarëve. Pra, dy janë faktorët kryesorë të këtij çmimi ndëshkues të litrit të naftës në Shqipëri. Ngarkesa fiskale më e lartë në botë. Nuk ka asnjë vend tjetër që të ketë ngarkesë fiskale më të lartë se Shqipëria.
Në një kohë kur çmimi i naftës apo litra e naftës në Gjermani iu kushton gjermanëve 1.2 përqind të të ardhurave ditore të tyre. U kushton zviceranëve rreth 1 përqind të të ardhurave ditore. Shqiptarëve u kushton 7 herë më shumë.
Ky është realiteti. Në qoftë se marrim çmimin e naftës me atë që quhet fuqi blerëse, çmimi i naftës në Shqipëri është absolut më i larti në Europë dhe në botë.
Pra, krahasuar me fuqinë blerëse të xhepave të tyre, çmimi i naftës për qytetarët shqiptarë është më i lartë se në çdo vend të Europës dhe në çdo vend të botës. Pra, nafta është një ndëshkim për qytetarët dhe ekonominë e vendit. Nuk ka asnjë vend tjetër të ketë një ngarkesë të çmendur fiskale mbi litrin e naftës siç e ka Shqipëria.
60 përqind e çmimit të naftës përbëhet nga ajo që qeveria u merr qytetarëve për çdo litër. Askush nuk e bën këtë përveç kësaj qeverie. Askush nuk e bën këtë dhe nuk mund të imagjinojë të bëjë një gjë të tillë. Në vitin 2013, taksa e qarkullimit ishte 7 lekë të vjetra për litër. E rriti në 28 lekë, e rriti me katër herë. Në një akt cinik të pashembullt, edhe akcizën e ka bërë të indeksueshme”,- ka deklaruar Berisha ndër të tjera.
