Dy anëtarët e PD-së Durrës, të cilët u përjashtuan nga kjo forcë politike, janë paraqitur mëngjesin e kësaj të mërkure në selinë blu në Tiranë, ku kanë kërkuar një takim me Sali Berishën.
Dritan Burgija kreu i grupit të këshilltarëve në Durrës, dhe anëtari Arlind Boshku, i cili mban edhe postin e sekretarit pranë kësaj dege, kanë kërkuar ballafaqim me Berishën, pasi vlerësojnë se vendimi për përjashtim ndaj tyre është i pa drejtë.
Vetë Berisha deklaroi pak ditë më parë se dy anëtarët janë përjashtuar nga PD pasi kanë bashkëpunuar me PS, ndërkohë që vetë Burgija dhe Boshku pretendojnë se janë përjashtuar pasi mbështetën Ervin Salianjin.
“Duam shpjegime për përjashtimin tim dhe Arlind Boshkut, kolegut tim. Isha edhe në 2021 para jush për të njejtën gjë pasi në atë kohë dilja dhe kërkoja dinjitetin e zotit Berisha pasi u përjashtua nga lidershipi i asaj kohe. Sot kërkoj dinjitetin tim. Nuk është çështje pozicionesh po dinjiteti. Çdo rresht i vendimit është anti statutor. Ka kërkuar ballafaqim me lidershipin këtu dhe fakte e prova që çuan në shkarkimin tim. Theksoj duam një ballafaqim me zotin Berisha, janë akuza shumë të rënda për mua dhe kolegun tim”, ka deklaruar Burgija për mediat.
