Ngjarja tragjike e vrasjes së një 17-vjeçari brenda ambienteve të një shkolle të mesme profesionale në Durrës, në dhjetor 2013, vijon t’i mbajë plagët të hapura për familjen e viktimës.
Çështja vijon të endet nëpër gjykata. Nuk është fjala vetëm për çështjen penale, por dhe atë civile që u hap nga familja e viktimës.
Edhe pse Gjykata Administrative e shkallës së parë Durrës vendosi më 27 janar 2021 detyrimin e shkollës për dëmshpërblim pasuror dhe jo pasuror, vendimi mësohet se është ankimuar nga Avokatura e Shtetit dhe deri tani nuk ka një datë të caktuar për nisjen e shqyrtimit në Apel.
Kjo vonesë e gjykimit mban familjen në pasiguri dhe i zgjat dhimbjen për mënyrën se si po trajtohet rasti.
Vendimi i Gjykatës Administrative të shkallës së parë Durrës për tragjedinë e ndodhur në dhjetor 2013 në ambientet e ofiçinës së shkollës së mesme profesionale “Beqir Çela” mund të konsiderohet si një proces pambyllur dhe pse i rëndësishëm në përballjen mes përgjegjësisë institucionale dhe dhembjes njerëzore.
Në vendimin e datës 27 janar 2021, gjykata vendosi pranimin pjesërisht të padisë dhe detyroi shkollën “Beqir Çela” të dëmshpërblejë familjen e viktimës, konkretisht 2,403,025 lekë për secilin prej prindërve për dëmin pasuror dhe jopasuror dhe 333,333 lekë shtesë për dëmin jopasuror për njërin prej paditësve, nënën. Një total prej afro 5,140,000 lekë.
Sipas gjykatës, bëhet fjalë për një ngjarje të rëndë, ku një 17-vjeçar humbi jetën brenda ambienteve të shkollës që duhet të garantojë siguri dhe mbrojtje, duke ngritur drejtpërdrejt përgjegjësinë e institucionit arsimor për mosveprim dhe dështim në përmbushjen e detyrimeve ligjore.
Në analizën e saj, gjykata ka vlerësuar se shkolla nuk ka marrë masat e nevojshme për garantimin e rendit dhe sigurisë, duke lejuar futjen e sendeve të kundërligjshme, pushkës automatike në shkollë, dhe duke mos ushtruar mbikëqyrjen e duhur mbi nxënësit, edhe pse kishte indicie për konflikte të mëparshme mes tyre. Ky mosveprim është konsideruar si një element me ndikim në pasojën tragjike, duke e përfshirë institucionin në përgjegjësi civile mbi bazën e parimit të përgjegjësisë indirekte.
Megjithatë, ndryshe nga sa mund të perceptohet, vlerat e dëmshpërblimit të përcaktuara në vendimin e gjykatës nuk janë ende përfundimtare dhe jo vetëm që nuk janë ekzekutuar, po nuk dihet as nëse do të jepen. Vendimi është ankimuar nga Avokatura e Shtetit dhe aktualisht çështja pritet të shqyrtohet nga Gjykata e Apelit.
Kjo do të thotë se procesi gjyqësor vijon dhe çdo detyrim financiar mbetet i pezulluar deri në një vendim të formës së prerë. Ky zhvillim procedural, edhe pse pjesë e mekanizmave ligjorë të mbrojtjes së interesave shtetërore, ka pasoja të drejtpërdrejta për familjen e viktimës.
Përballja me humbjen e një fëmije është një dhimbje që nuk shuhet, por zgjatja e procesit gjyqësor dhe pasiguria mbi përfundimin e tij e thellojnë më tej këtë plagë.
Ankimi i vendimit, shqyrtimi i të cilit nuk dihet kur do të bëhet, pasi nuk ka ende një datë për të, perceptohet si pengesë dhe vonesë në dhënien e drejtësisë për familjen e 17-vjeçarit Adriatik Tota, prindërit dhe motrën e tij./Top Channel
