Dy persona kanë përfunduar në prangat e Policisë në Tiranë, pasi u kapën duke qarkulluar me armë zjarri në automjet.
Bëhet fjalë për shtetasit I.M., 40 vjeç, dhe A.S., 35 vjeç, të dy banues në Kamëz.
Sipas njoftimit zyrtar, shërbimet e Policisë kanë ndaluar automjetin në zonën e njohur si “Zona e Treshit”. Gjatë kontrollit fizik ndaj drejtuesit të mjetit, 40-vjeçarit, u gjet një armë zjarri pistoletë me municion luftarak, e cila posedohej pa leje dhe dyshohet se do të shitej në këtë zonë.
Në lidhje me këtë rast, 40-vjeçari akuzohet për posedim të paligjshëm dhe tentativë për shitje të armës së zjarrit, ndërsa 35-vjeçari, që ndodhej si pasagjer në automjet, u arrestua për moskallëzim krimi.
Policia bëri me dije se arma e zjarrit u sekuestrua në cilësinë e provës materiale, ndërsa materialet procedurale i janë referuar Prokurorisë së Tiranës për veprime të mëtejshme.
