Administrata Tatimore ka ushtruar kontrolle në tregun agro-ushqimor në Kashar, në kuadër të përpjekjeve për rritjen e sigurisë ushqimore dhe luftën kundër informalitetit në këtë sektor.
Sipas njoftimit zyrtar, nga monitorimi në distancë janë evidentuar dyshime të arsyeshme se disa tatimpagues që operojnë në tregtimin e produkteve bujqësore dhe blegtorale ushtronin aktivitetin duke shmangur detyrimet tatimore. Për verifikimin e këtyre rasteve në terren, task-forca e Drejtorisë së Verifikimit dhe Koordinimit në Terren zhvilloi kontrolle të drejtpërdrejta në treg.
Gjatë kontrolleve u konstatuan shkelje të rënda të legjislacionit tatimor, ndër të cilat moslëshimi i faturës tatimore, si dhe moslëshimi i autofaturës për produktet bujqësore – një detyrim i përcaktuar për formalizimin e zinxhirit të furnizimit në këtë sektor.
Tregu agro-ushqimor në Kashar administrohet nga shoqëria EKMA Albania sh.p.k., me administrator Klodian Allajbeu, e regjistruar prej vitit 2009 dhe me aktivitet të shtrirë edhe në tregtinë dhe import-eksportin e produkteve ushqimore. Ky treg ka qenë edhe më herët në fokus të institucioneve, pasi është gjobitur nga Autoriteti i Konkurrencës për shkelje të rregullave të konkurrencës dhe për abuzim me pozitën dominuese në treg.
Administrata Tatimore u bën thirrje të gjithë tatimpaguesve që operojnë në këtë sektor të përmbushin detyrimet ligjore, duke paralajmëruar se kontrollet do të vijojnë në të gjithë vendin, me synim formalizimin e aktivitetit ekonomik dhe garantimin e konkurrencës së ndershme në tregun agro-ushqimor. /ekofin.al
