Vendet e BE-së ranë dakord të martën të ndryshojnë ligjin evropian për t’u lejuar eurodeputetëve të japin vota me prokurë në fazën e fundit të shtatzënisë dhe gjashtë muaj pas lindjes.
“Asnjë përfaqësuese e zgjedhur nuk duhet të zgjedhë midis shërbimit ndaj votuesve të saj dhe lindjes së fëmijëve”, tha Presidentja e Parlamentit Europian, Roberta Metsola, për POLITICO në një deklaratë. “Duke modernizuar rregullat tona, ne po mbrojmë drejtësinë, barazinë dhe një Parlament që pasqyron vërtet njerëzit që u shërben.”
Eurodeputetët kanë bërë fushatë prej vitesh për të ndryshuar rregullat që përcaktojnë se ato duhet të jenë fizikisht të pranishme për të hedhur votën në Parlamentin Europian, pavarësisht fazës së shtatzënisë ose sa shpejt është pas lindjes së fëmijës së tyre. Në një intervistë me POLITICO në vitin 2023, eurodeputetja holandeze Lara Wolters tha se rregullat dërguan një “sinjal të keq, veçanërisht për gratë e reja”.
Ministrat e çështjeve evropiane, të mbledhur në Këshillin e Çështjeve të Përgjithshme të martën, votuan në favor të një plani për t’u lejuar eurodeputeteve të hedhin votat e tyre me prokurë në tre muajt e fundit të shtatzënisë dhe gjashtë muajt e parë pas lindjes.
Një diplomat i lartë i BE-së i tha POLITICO-s, se Këshilli tani do të duhet ta përcjellë tekstin në Parlamentin Evropian për të marrë dritën jeshile zyrtare, përpara se të kthehet në Këshill për miratim përfundimtar. Propozimi më pas do të duhet të ratifikohet nga vendet anëtare të BE-së përpara se të hyjë në fuqi.
Plani “përfaqëson një hap pozitiv për përfaqësimin demokratik”, tha diplomati, dhe do t’i ndihmojë eurodeputetët “të pajtojnë jetën private me punën dhe të sigurojnë përfaqësim gjithëpërfshirës”.
BE-ja synon ta zbatojë propozimin deri në zgjedhjet e ardhshme të Parlamentit Europian në vitin 2029, siç raportohet në POLITICO Brussels Playbook të së martës.
Metsola tha në mediat sociale: “Nuk jemi ende atje, por po e kthejmë këtë angazhim në realitet.”/ Politico.
