Deputeti demokrat Klevis Balliu akuzoi kryeministrin Edi Rama për gjuhën e përdorur në konferencën e sotme për shtyp, duke e cilësuar “vulgare” dhe shenjë të tensionit pas aferave korruptive që po heton drejtësia.
Sipas tij, agresiviteti i Ramës ndaj medias, opozitës dhe madje edhe ndaj partisë së tij tregon një situatë të rënduar, ku kryeministri rrezikon jo vetëm pushtetin, por edhe burgun.
Balliu shtoi se “perdja e fundit” e Ramës ra, pasi nuk mund të fshihet më pas mbështetjes së ndërkombëtarëve, duke e krahasuar situatën me kohën e vendimeve të një partie mbi ligjin dhe Parlamentin.
“Rama ka kohë që është në tension. Çështja Balluku është më shumë çështja Rama e jo Balluku. Gjuha vulgare që përdori sot ndaj medias dhe opozitës, sikurse edhe ajo ndaj partisë së tij, e tregon këtë. Gjithë agresiviteti i tij tregon një problem dhe situatë të rënduar. Ai nuk po rrezikon vetëm pushtetin, por edhe burgun. Sepse ashtu siç ka ardhur çështja Balluku, mos u habisni kur të vijë ndonjë fletë-arresti edhe ndaj tij. Gjuha e urrejtjes që ai përdori ndaj gazetarëve ishte arrogante teksa nxori jashtë dy gazetarë.
Atij i ra edhe perdja se “ndërkombëtarët donin vetëm atë”. Në fakt perdja e tij ra që para votimit dhe më pas i ra edhe perdja e fundit ku fshihej pas deklaratave të ambasadave të Gjermanisë, Britanisë, Holandës dhe të tjerave. Jemi kthyer 37 vite pas, ku vendimet e një partie prevalojnë përpara Parlamentit dhe ligjit”, tha Balliu.
