Një ngjarje e paprecedentë raportohet të ketë ndodhur në Sarandë, ku një 62-vjeçar, i identifikuar si Shefki Kaçupaj ka hyrë i armatosur në banesën e fqinjëve të tij dhe i ka kërcënuar me armë zjarri.
Sipas policisë incidenti ka ndodhur në lagjen nr. 4 të qytetit, ku një shtetase ka njoftuar policinë se fqinji i saj kishte hyrë në banesën e saj me pistoletë dhe po kanoste atë dhe familjarët e saj.
Nga hetimet paraprake dyshohet se konflikti mes fqinjëve kishte lindur për shkak të mosmarrëveshjeve për shfrytëzimin e një pjese të përbashkët të pallatit, konkretisht të tarracës së ndërtesës ku ata banonin.
Si pasojë policia ka arrestuar në flagrancë Kaçupajn, ndërsa iu sekuestrua edhe arma e zjarrit, një pistoletë me mulli.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Sarandë për veprime të mëtejshme.
