Irani ka lëshuar raketa drejt territorit izraelit si kundërpërgjigje ndaj sulmeve të ndërmarra më herët nga SHBA dhe Izraeli. Lajmi është konfirmuar nga Forcat e Mbrojtjes së Izraelit (IDF), të cilat njoftuan se sistemet e mbrojtjes ajrore janë aktivizuar menjëherë pas identifikimit të kërcënimit.
Sipas IDF, sirenat e alarmit u dëgjuan në disa zona të vendit, ndërsa qytetarëve iu kërkua të ndjekin me përpikëri udhëzimet e Komandës së Frontit të Brendshëm dhe të qëndrojnë në strehime.
Forcat Ajrore izraelite janë angazhuar për të interceptuar raketat dhe për të neutralizuar objektivat në ajër. Autoritetet theksuan se sistemi mbrojtës nuk është i papërshkueshëm dhe për këtë arsye kërkohet kujdes maksimal nga popullsia.
Zhvillimet vijnë pas konfirmimit nga presidenti i Shtetet e Bashkuara, Donald Trump, se SHBA po zhvillon “operacione të mëdha luftarake” kundër Iranit, në bashkëpunim me Izraelin.
Në një mesazh publik, Trump deklaroi se qëllimi i operacionit është eliminimi i kërcënimeve të menjëhershme ndaj interesave amerikane dhe aleatëve të saj. Ai paralajmëroi se SHBA do të godasë infrastrukturën raketore iraniane dhe akuzoi Teheranin për përpjekje për të rindërtuar programin bërthamor.
Presidenti amerikan u bëri thirrje qytetarëve iranianë të qëndrojnë në shtëpi për shkak të rrezikut nga bombardimet, ndërsa paralajmëroi se operacioni mund të ketë edhe kosto njerëzore për trupat amerikane.
