Britania e Madhe ka tërhequr përkohësisht stafin nga ambasada e saj në Teheran, në një moment kur tensionet mes Shtetet e Bashkuara dhe Irani janë rritur ndjeshëm.
Ministria e Jashtme britanike konfirmoi se ambasada do të vijojë të funksionojë në distancë, ndërsa situata në rajon mbetet e paqëndrueshme. Lëvizja vjen në një kohë kur disa shtete po u kërkojnë qytetarëve të tyre të largohen nga Irani dhe zona të tjera të Lindjes së Mesme për shkak të rrezikut të përshkallëzimit.
Ndërkohë, ambasada amerikane në Izrael u ka dhënë mundësi disa punonjësve jo emergjentë të largohen nga vendi. Sipas mediave amerikane, ambasadori Mike Huckabee ka inkurajuar stafin që dëshiron të largohet ta bëjë këtë menjëherë.
Situata u tensionua pas raundit të fundit të bisedimeve mes Uashingtonit dhe Teheranit në Gjenevë, të cilat u konsideruan si një përpjekje për të shmangur përplasjen lidhur me programin bërthamor iranian. Ndërmjetësi Oman njoftoi për “progres të rëndësishëm” dhe tha se negociatat do të vazhdojnë, ndërsa nga Uashingtoni nuk ka ende një reagim zyrtar. Edhe pala iraniane foli për “progres të mirë”.
Presidenti Donald Trump ka paralajmëruar se do të ndërmarrë veprime ushtarake nëse nuk arrihet një marrëveshje për programin bërthamor të Iranit. Ai ka urdhëruar gjithashtu shtimin e pranisë ushtarake amerikane në Lindjen e Mesme. Nga ana tjetër, Teherani ka paralajmëruar se do t’i përgjigjet me forcë çdo sulmi të mundshëm.
Edhe Kina, India dhe Kanadaja u kanë bërë thirrje qytetarëve të tyre të largohen sa më shpejt nga Irani, për shkak të rritjes së rrezikut në rajon.
