Kryeministri Edi Rama, në mbledhjen e grupit parlamentar socialist këtë të enjte, deklaroi se Partia Socialiste ndodhet në një “udhëkryq të ri” dhe përballë një “sprove” që kërkon disiplinë dhe vendosmëri.
Deklarata e Ramës përkon me zhvillimet e fundit, ku SPAK po heton ministra dhe ish-ministra për korrupsion, përfshirë edhe kërkesën për arrestimin e Belinda Ballukut.
“Sot po sprovohet aftësia jonë udhëheqëse, pjekuria politike dhe shoqërore”, tha Rama.
Pyetja që lind është nëse kryeministri po përgatit terrenin për të ndërhyrë në drejtësi, duke e paraqitur si “rrezik” për stabilitetin politik.
“Jemi në një udhëkryq të ri. Ndërkohë që ekonomia ecën me ritmet e parashikuara, duke riafirmuar një rritje të qëndrueshme, e pakrahasueshme me asnjë periudhë të mëparshme, ndërkohë që Shqipëria vazhdon të shkëlqejë ndërkombëtarisht si asnjëherë më parë, ndërkohë që projektet në zhvillim apo në plan për t’u zhvilluar këtë mandat janë më ë shumta se kurrë më parë, udhëkryqi ku ndodhemi sot, paraqet sipas meje disa rreziqe, që kërkojnë adresim të vendosur dhe disiplinë të fortë nga ana jonë.
“Sot po sprovohet aftësia jonë udhëheqëse, pjekuria politike dhe shoqërore. Pikërisht kur duhet të ngjitemi edhe më lart dhe kur tanimë, diferencën mes pikës ku jemi dhe ku duam të mbërrijmë, e bën çdo detaj. Nuk është e lehtë të ngjitesh nga një humnerë dhe të vish në normalitet, gjë që ne e bëmë, por është edhe më e vështirë të ngjitesh më lart sot”. – tha Rama për deputetët.
