Pas përfundimit të seancës paraprake në GJKKO, avokati i Ilir Metës, Kujtim Cakrani, deklaroi para mediave se mbrojtja ka kërkuar pushimin e çështjes për dosjen CEZ/DIA, duke theksuar se, sipas tij, nuk ekziston fakti penal që implikon Metën.
Sa i përket çështjes së lobimit, Cakrani u shpreh se hetimi është i paplotë, pasi sipas tij –nuk është marrë në pyetje një nga personat kryesorë të përmendur në dosje, Ardian Shatku, emri i të cilit, sipas avokatit, përmendet dhjetëra herë në aktet e hetimit.
Në lidhje me akuzat për ligjin e minierave, ku përfshihen Ilir Meta dhe Monika Kryemadhi, mbrojtja ka kërkuar kthimin e çështjes për plotësim hetimesh.
Sipas Cakranit, duhet të merren në pyetje të gjithë deputetët që kanë votuar ligjin, si edhe kryeministri Edi Rama, i cili sipas tij kishte deklaruar në atë kohë se ligji do të zgjidhte problemet e minatorëve.
“Për CEZ kemi kërkuar pushimi ne çështjes. Nuk ekziston fakti që e ka bërë zoti Meta. Për lobimin nuk janë pyetur persona që janë kryesor, Ardian Shatku përmendet 130 herë dhe nuk është thirrur qoftë në Prokurori qoftë në SHBA.
Kemi kërkuar për çështjen e ligjit të minierave ku akuzohen Meta dhe Kryemadhi, kemi kërkuar që çështja të kthehet, dhe të pyeten deputetët dhe zoti Rama që tha me ligjin e minierave nuk do ketë më probleme minatorët. Provat dhe aktet që akuzohet Meta duhet të vazhdojë hetimi. Në datën 5 orën 10 do jetë seanca e radhës. Brenda datës 20 do ketë një vendimmarrje”, tha ai.
