Prokuroria e Posaçme ka lexuar këtë të martë konkluzionet përfundimtare dhe ka dhënë pretencën për ish-shefin e Rrugores, Roven Zeka dhe dy vartës të cilët akuzohen se morën 2 mijë euro rryshfet për të mos arrestuar një grua e cila shkaktoi një aksident me pesë të plagosur.
Konkretisht, për ish-shefin e rrugores Roven Zeka, SPAK ka kërkuar dënimin me 4 vite burg, dënimi të zbresi në 2 vite e 8 muaj për shkak të gjykimit të shkurtuar dhe të konvertohet në 3 vite shërbim prove.
Të njëjtin dënim SPAK ka kërkuar edhe për ish-shefin e hetimit të aksidenteve Sokol Novakun.
Për oficerin e OPGJ, Edison Tabaku, organi i akuzës ka kërkuar deklarimin e tij fajtor dhe dënimin me 5 vite burg, si dhe uljen e 1/3 së dënimit.
Ndërsa për të pandehurin Bledi Belba, i përfshirë në skemën e korrupsionit, prokuroria ka kërkuar dënimin me 1.6 vite burg, të pezullohet dënimi dhe të konvetohet në shërbim prove.
Ndërsa për biznesmenin Ergest Vrionin, SPAK kërkoi dënim me 2 vite. Për shkak te gjykimit me procedurë të shkurtuar dënimi të zbresë ne 1 vit e 4 muaj dhe te pezullohet, duke e vendosur Vrionin në shërbim prove për këtë periudhë.
Hetimet
Personat e lartpërmendur dyshohen se kanë marrë ryshfet në lidhje me një aksident të regjistruar më 16 Prill 2025 në Tiranë, ku automjeti që drejtohej nga shtetasja Anisa Vrioni është përplasur me një automjet tjetër ku udhëtonin 5 persona, të cilët kanë mbetur të plagosur dhe janë transportuar në spital.
Rasti u zbulua pasi bashkëshorti i Anisës, Ergest Vrioni është nën hetim dhe përgjim nga SPAK për korrupsion. Nga përgjimet ka rezultuar se punonjës të Policisë Rrugore i kanë kërkuar familjarëve të shoferes Anisa Vrioni, pagesën prej 2 mijë eurosh, për mosarrestimin e saj.
SPAK raportoi se shuma e parave është kërkuar të dorëzohej brenda një kohe të shkurtër dhe është siguruar nga biznesmeni Ergest Vrioni, me ndihmën e personave të tjerë dhe i është dorëzuar njërit prej efektivëve të Rrugores.
Fillimisht mësohet se një mijë euro i janë dhënë OPGJ-së Edison Tabaku, pranë banesës së tij, nga Bledi Belba. Më pas, vetë Tabaku e ka takuar sërish Erges Vrionin në një lokal pranë komisariatit të Policisë Rrugore dhe i ka kërkuar edhe një mijë euro të tjera, pasi i thotë “kam persona të tjerë mbi kokë”.
Nga verifikimi që i është bërë telefonit të Tabakut ka rezultuar se ai ka komunikime me shefat e tij, Roven Zeka dhe Sokol Novaku, ku i thotë se 1000 eurot e tjera do t’i siguronte më vonë nga Vrioni, të cilin e kishte shok, duke i lënë afat deri të nesërmen.
“Në datën 16 prill 2025, në qytetin e Tiranës ka ndodhur një aksident rrugor, ku dy automjete janë përplasur me njëri tjetrin. Si pasojë e aksidentit, pesë personat që udhëtonin në njërin nga automjetet janë dërguar në spital për të marrë ndihmë mjekësore. Ndërsa në automjetin tjetër ndodhej vetëm drejtuesja A.V, bashkëshortja e shtetasit E.V, i dyshuar për kryerjen e veprës penale të “Korrupsionit aktiv të personave që ushtrojnë funksione publike”, (parashikuar nga neni 244 i Kodit Penal.)
Pas të dhënave dhe informacionit të siguruar nga oficerët e Byrosë Kombëtare të Hetimit (BKH), ka rezultuar se punonjës të policisë rrugore i kanë kërkuar familjarëve të drejtueses së automjetit, shtetases A.V, pagesën prej 2 mijë eurosh, për mosarrestimin e saj. Shuma e parave është kërkuar të dorëzohej brenda një kohe të shkurtër dhe është siguruar nga personi nën hetim E.V, me ndihmën e personave të tjerë. Këtë shumë ai ia kanë dorëzuar njërit prej punonjësve të policisë rrugore – fakt i provuar gjatë hetimit.” – thuhej në njoftimin e Prokurorisë së Posaçme.
Burime për mediat bënë me dije se gjatë kontrollit në banesën e Edison Tabakut, oficerët e BKH-së kanë sekuestruar rreth 50 milionë lekë (25 milionë lekë të vjetra dhe 26 mijë euro). Shuma e parave të sekuestruara u konfirmua edhe nga SPAK, edhe pse nuk u tha se në cilën banesë ishin gjetur.
