Gjykata Administrative e Tiranës ka vendosur të rrëzojë kërkesën për sigurimin e padisë së aktores Anila Bisha, lidhur me përdorimin e imazhit të saj për ministren e Ramës, “Diella”.
Në padinë e bërë në Gjykatën Administrative ndaj AKSHI-t dhe Këshillit të Ministrave, Bisha kërkonte ‘pezullimin’ e funksionimit të ministres së Shtetit për Inteligjencën Artificiale deri në përfundim të shqyrtimit gjyqësor, si dhe ndalimin e përdorimit të të dhënave të saj personale.
Çështjen e shqyrtoi gjyqtari Armand Shkurta, i cili vendosi të rrëzojë kërkesën për masë sigurimi.
Kontrata mes Kompanisë Aleat dhe aktores Anila Bisha kishte efekt deri më 31 dhjetor 2025, dhe përfshinte vetëm lejen për përdorimin e imazhit për asistenten virtuale Diella, në e-albania dhe jo për ministren Diella.
Bisha kundërshton shfaqjen e avatarit në rolin e ministres, duke e cilësuar si veprim të kryer pa dijeninë dhe pëlqimin e saj.
Në dokumentet e dorëzuara në gjykatë, Bisha thekson se krijimi i avatarit është realizuar pa autorizim paraprak dhe se përdorimi i të dhënave të saj ka prodhuar një duplikat digjital të identitetit të saj.
Ndërkohë procesi gjyqësor vijon me shqyrtimin e padisë në themel.
LEXO EDHE:
Aktorja Anila Bisha padit AKSHI-n, kërkon pezullimin e Diellës në Gjykatë
