Akuza të reja janë ngritur ndaj Prince Andrew, lidhur me përdorimin e fondeve publike gjatë kohës kur shërbente si i dërguar tregtar i Mbretërisë së Bashkuar në vitet 2001–2011.
Sipas një artikulli të publikuar nga BBC, një ish-nëpunës civil, që ka folur në kushte anonimiteti, pretendon se ka hasur disa herë në fatura të larta shpenzimesh që lidhen me udhëtime të supozuara zyrtare të Andrew. Ai ka rrëfyer se në një rast kishte refuzuar të miratonte pagesën për një masazh, duke e konsideruar të papërshtatshme përdorimin e parave të taksapaguesve për shpenzime personale. Megjithatë, sipas tij, pagesa u krye pas ndërhyrjes së eprorëve.
Burimi i dytë i cituar nga BBC ka deklaruar se ka parë kërkesa të përsëritura për rimbursime që përfshinin fluturime, qëndrime në hotele dhe shpenzime për stafin shoqërues. Në disa raste, sipas tij, nuk ishte e qartë sa persona e shoqëronin ish-princin dhe në çfarë cilësie.
Këto pretendime dalin në një kohë kur Andrew vijon të përballet me presion publik për shkak të lidhjeve të tij me financierin amerikan Jeffrey Epstein, i dënuar për krime seksuale. Thirrjet për një hetim më të gjerë mbi aktivitetet dhe marrëdhëniet e tij janë shtuar.
