Rrëshqitjet e dheut në zonën “Arrat e Gurrës”, në Dragostunjë të Librazhdit, kanë shkaktuar dëmtime në disa segmente të infrastrukturës, duke prekur rrugën kombëtare, një shtyllë të tensionit të lartë dhe një pjesë të linjës hekurudhore.
Është dëmtuar segmenti rrugor në aksin që lidh Librazhdin me Prrenjas, si dhe zona e aksit Qukës–Qafë Plloçë.
Gjithashtu, është konstatuar dëmtim në bazamentin e një shtylle 110 kV, pjesë e rrjetit të transmetimit të energjisë elektrike.
Rrëshqitjet kanë prekur edhe linjën hekurudhore Elbasan–Librazhd–Prrenjas–Gur i Kuq, konkretisht në segmentin Librazhd–Xhyrë, ku janë evidentuar deformime të trasesë dhe zhvendosje të shinave.
