Nga Boldnews.al
Si lider i një fshati të vogël me emrin Shqipëri, kryeministri Edi Rama nuk mund të linte rastin të shkëpuste qoftë edhe pak sekonda vëmendjen e liderit të botës, presidetit të SHBA-ve Donald Trump. Në momentin e përmbylljes së takimit të “Bordit të Paqes”, Rama shtyu sa mundi uzbekë, kazakë, sheikë e çgjeti përpara që t’i afrohej me zvarritje e jargavitje Trumpit. Gjithçka e “justifikuar” për “qëllimin” e madh në dukje.
E gjeti çastin dhe niste një dialog të shkurtër që nga leximi buzëve të trashura dallohej se po flitej për katër drejtuesit e lartë të UÇK-së Hashim Thaçi, Kadri Veseli, Jakup Krasniqi dhe Rexhep Selimi të cilët prej gjashtë vitesh ndodhen në burgun e Gjykatës së Hagës në pritje të vendimit që do të merren për akuzën e rëndë dhe në kapërcim të çdo kufiri absurdi, siç është ajo e “krimeve të luftës”.
Në pak sekonda Trump kthehet nga Vjosa Osmani, presidentja e Kosovës, të cilën Trump me emër të përvetshëm i kishte shprehur vlerësime duke iu drejtuar: “Po bëni një punë të shkëlqyer”, çka nuk e tha aspak për Ramën kur e thirri në apel… Çfarë kërkuan Osmani dhe Rama u kuptua, por çfarë përgjigje dha Trump ende nuk dihet, por koha jo e largët do e tregojë, pasi të paktën një “dëshmitari” i duhet besuar, dhe padyshim që është Osmani.
Rama e mori vëmendjen për pak çaste, fundja për atë kishte shkuar, duke bërë gjeste të njohura në zvarritjen për një shtrëngim duarsh apo bisede të shkurtër me më të fuqsishmit, për ta shitur në fshatin e tij Shqipëri si “mbështetje personale”, por pjesëmarrja aktive e Vjosës në atë bisedë e sfumoi “madhështinë” e shtirur të njeriut që atë foto do e shësë në katundin tonë si “vlerësim personal”.
Halli i tij është se vëmendjen ia mori Vjosa Osmani, edhe ajo në ngritje të kuotave të saj politike, pasi Kosova në pak muaj do të përballet me zgjedhjen e presidentit dhe Osmani është më pranë një mandati të dytë.
Të gjithë të pranishmit në të vërtetë nuk bënë më pak se Rama. Gjithkush mundohej të binte sa më shumë në sy. Madje edhe Sekretari i Përgjithshëm i Partisë Komuniste, lideri i Vietnamit, po ashtu edhe kazakë, uzbekë, sheikë apo liderët e Kongos e Tongos. Padyshim që në këtë valle nuk mund të mungonte Rama, por prishja e filmit nga prania e Vjosës i përmbyti propagandën!
