Ka nisur seanca gjyqësore në Gjykatën e Posaçme, për dosjen e njohur si “Plumbi i Artë”.
Përfaqësuesja e SPAK, prokurorja Doloreza Musabelliu, po paraqet dhe lexon provat shkresore të mbledhura gjatë hetimit.
Sipas prokurores, nga hetimet janë identifikuar kodet e përdorura në platformën e enkriptuar Sky ECC nga i penduari i drejtësisë Nuredin Dumani, fakt që sipas saj është konfirmuar dhe përsëritur në disa raste.
SPAK paraqiti procesverbalet e identifikimit të tre llogarive në Sky, të lidhura me Dumanin, si edhe me të pandehurit Henrik Hoxhaj, Aldo Baho, Erjon Alibej, Armand Tragaj, Ardian Subashi (Çollaku), Arjan Saliu (i vrarë) dhe Festim Qoli. Sipas akuzës, në këto komunikime evidentohen episode të ndryshme kriminale.
Në bisedat e administruara si prova përmenden vrasja e Dorian Shkozës dhe Anxhelo Avdias, plane për eliminimin e Indrit Dokles dhe Emiliano Ramazanit, si dhe ngjarje të tjera të rënda. Prokuroria lexoi gjithashtu dokumentacionin që lidhet me shpërthimin me eksploziv në banesën e Talo Çelës, vrasjen e Fatmira Dedjes, atentatin ndaj Sanxhaktarit dhe ekzekutimin e dy vëllezërve Haxhia.
“Ju vendosim në dispozicion procesverbalet dhe provat shkresore për të gjitha faktet penale, duke nisur nga faqja 174, ku përfshihet edhe sigurimi i kushteve për vrasjen e Elton Kilës dhe tentativa për të vrarë Nuredin Dumanin”, deklaroi përfaqësuesja e SPAK, duke theksuar se materialet përfshijnë këqyrjet e vendngjarjeve dhe dëshmitë e bashkëpunëtorit të drejtësisë.
Dosja “Plumbi i Artë” është një nga çështjet më të bujshme të drejtësisë shqiptare, e lidhur me atentate të armatosura dhe rrjetet e krimit të organizuar. Të pandehurit e dosjes akuzohen për vrasje, atentate të mbetur në tentativë dhe vjedhje me dhunë, të zbardhura pas dëshmisë së bashkëpunëtorit të drejtësisë Nuredin Dumani.
