Në fshatin Lumas, pjesë e Bashkisë së Kuçovës, banorët thonë se jetojnë prej dekadash në të njëjtat kushte infrastrukturore.
Për të kaluar lumin dhe për të shkuar në shkollë, në punë apo për nevoja të përditshme, ata detyrohen të heqin këpucët dhe të kalojnë zbathur, një realitet që sipas tyre vazhdon edhe në vitin 2026.
Sa herë niveli i ujit rritet, fshati mbetet i izoluar. Banorët shprehen se për çdo shërbim duhet të presin derisa lumi të bjerë, pasi mjetet nuk mund të kalojnë. Situata bëhet edhe më e rëndë në raste emergjente.
Sipas dëshmive të tyre, ka pasur raste kur persona të sëmurë nuk janë transportuar dot në kohë drejt spitalit, për shkak se ambulancat nuk kanë pasur mundësi të kalojnë lumin. Në disa raste, vonesat kanë rezultuar fatale.
Banorët theksojnë se nuk bëhet fjalë për komoditet, por për akses bazë në shërbime jetike, si kujdesi shëndetësor dhe arsimi. Mungesa e një ure apo rruge funksionale, sipas tyre, është një problem që zvarritet prej periudhës së komunizmit.
Në një kohë kur flitet për investime infrastrukturore dhe zhvillim, ata kërkojnë ndërhyrje të menjëhershme nga Bashkia e Kuçovës dhe institucionet qendrore për ndërtimin e një ure funksionale, në mënyrë që asnjë banor të mos rrezikojë jetën për shkak të mungesës së infrastrukturës minimale.
View this post on Instagram
