Kreu i Grupit Parlamentar në PD, Gazmend Bardhi ka reaguar në lidhje me ofensivën e paralajmëruar nga Edi Rama për Belinda Ballukun, i cili u shpreh se do të ndërhyjë në legjislacion për pezullimin nga detyra të një ministri.
Në një reagim në rrjete sociale, Bardhi shprehet se përpjekja e Ramës për ta paraqitur hetimin penal ndaj Ballukut si debat teorik për ndarjen e pushteteve nuk ka të bëjë me parime kushtetuese, por me frikën nga humbja e pushtetit.
Ai shton se në vendet e BE-së dhe në SHBA, zyrtarët që përfshihen në hetime për korrupsion japin dorëheqjen, ndërsa sipas tij, në Shqipëri po zvarritet arrestimi i Ballukut pasi po tentohet ndryshimi i ligjit për të krijuar një “imunitet të ri për pushtetin”.
“Edi Rama po përpiqet ta shndërrojë një hetim penal ndaj Belinda Ballukut në një debat teorik për ndarjen e pushteteve. Por kjo nuk është çështje parimi. Është çështje frike. Ligji është i qartë: pezullimi nga detyra është masë e parashikuar në Kod. Ai nuk shkarkon ministrin, nuk paralizon shtetin, nuk prek institucionin. Ndalon përkohësisht personin nën hetim të ushtrojë funksionin, për të mbrojtur procesin penal.
Të thuash se “pezullohet funksioni” është deformim i qëllimshëm. Gjykata nuk pezullon qeverinë. Pezullon një individ nga ushtrimi i detyrës.
Në BE dhe në SHBA, kur një zyrtar përfshihet në hetim për korrupsion, ai largohet. Jep dorëheqjen. Nuk ndryshon ligjin për të mbrojtur veten, siç po bën Edi Rama. Prandaj, firmosja prej tij e ndryshimit të ligjit pikërisht në momentin kur Parlamenti duhet të shqyrtojë kërkesën për arrest të Belinda Ballukut, nuk ka të bëjë me ndonjë parim kushtetues. Është ndërhyrje politike për të dobësuar hetimin dhe për të krijuar një imunitet të ri për pushtetin.
Por thelbi sot nuk është vetëm pezullimi. Thelbi është kërkesa për arrest e Belinda Ballukut, që ndodhet në Kuvend prej gati dy muajsh dhe trajtohet nga Edi Rama sikur nuk ekziston. Përfaqësuesit e BE-së dhe SHBA-së kanë qenë të qartë: procedura duhet të vazhdojë pa vonesë. Këshilli i Mandateve duhet të mblidhet. Parlamenti duhet të votojë. Respekti ndërkombëtar nuk fitohet me fotografi protokollare. Ai fitohet me respekt për shtetin ligjor. Sepse nëse pengon drejtësinë në Tiranë, nuk të shpëton asnjë foto ceremoniale në Uashington”,- shkruan Bardhi.
