Një situatë shqetësuese është konstatuar këtë të shtunë në qytetin e Sarandës, ku është vërejtur ndërhyrje në vijën bregdetare përmes hedhjes së materialeve inerte në det, me qëllim mbushjeje.
Pamjet dhe informacionet nga vendngjarja tregojnë se procesi po zhvillohej në një zonë të frekuentuar, duke ngritur pikëpyetje mbi ligjshmërinë e ndërhyrjes dhe ndikimin në mjedis.
Prania e policisë bashkiake në vendngjarje, pa ndërhyrë për të ndaluar veprimet, shton edhe më shumë dyshimet mbi tolerimin institucional dhe mungesën e reagimit për mbrojtjen e ligjit.
Ky qëndrim pasiv i strukturave vendore lë të kuptohet se ndërhyrja po kryhej me mbështetje të heshtur, ose në rastin më të mirë, me neglizhencë të plotë.
Në këtë kontekst, përgjegjësia bie mbi drejtimin vendor dhe kryebashkiakun Oltion Çaçi, i cili duket se ka dështuar të garantojë mbrojtjen e vijës bregdetare dhe respektimin e ligjit.
