Kancelari gjerman, Friedrich Merz, bëri thirrje për një Europë më të fortë politikisht dhe ushtarakisht, me qëllim rivendosjen e marrëdhënieve të qëndrueshme me Shtetet e Bashkuara të Amerikës.
Duke folur në hapje të Konferencës së Sigurisë në Mynih, ai theksoi se në një kohë rivaliteti mes fuqive të mëdha globale, as SHBA-të nuk mund të përballojnë të veprojnë të vetme në skenën ndërkombëtare.
“Në epokën e rivalitetit të fuqive të mëdha, as Shtetet e Bashkuara nuk do të jenë mjaftueshëm të fuqishme për të vepruar vetëm. Të qenit pjesë e NATO-s nuk është vetëm avantazh konkurrues i Evropës, por edhe i Shteteve të Bashkuara”, deklaroi Merz.
Ai nënvizoi se Europa duhet të rrisë kapacitetet e saj mbrojtëse dhe të marrë më shumë përgjegjësi për sigurinë e kontinentit, duke forcuar njëkohësisht bashkëpunimin transatlantik.
Deklaratat e kancelarit gjerman vijnë në një moment tensioni gjeopolitik dhe sfidash të shumta për arkitekturën e sigurisë globale, ku roli i NATO-s dhe raportet mes Brukselit dhe Uashingtonit mbeten thelbësore.
