Deputetja e Partisë Socialiste, Aulona Bylykbashi, ka folur në lidhje me protestën e mbajtur një ditë më parë nga Partia Demokratike, në të cilën punonjës të policisë dhunuan protestuesit, mes tyre edhe deputetin Bledion Nallbati.
Edhe pse ky i fundit u dhunua me shkop gome nga policia dhe përfundoi në Spitalin e Traumës, deputetja socialiste është shprehur se situata ka dalë nga konteksti.
Sipas saj video nuk është publikuar e gjithë, ndërsa ka ngritur akuza ndaj Sali Berishës, se përdor retorikë për të krijuar destabilitet politik.
“Protesta ishte një situatë e vështirë, krijuar për forcat e rendit që janë aty në krye të detyrës dhe detyrohen të përballen me akte të dhunshme. Prononcimet e bëra sot nga lideri i opozitës shkojnë në të njëjtën qasje, duke e shfaqur dhunën si pjesë të protestës. Mendoj se reagimi i forcave ka qenë proporcional. Për rastin e deputetit Nallbani, videoja që ka qarkulluar është nxjerrë nga konteksti, nuk është e plotë dhe nuk jep pamjen e plotë të reagimit të tij ndaj policisë. Edhe nëse ka pretendime për tejkalim të masës nga efektivët, ato mund t’i drejtohen institucioneve përkatëse. Ishte retorika e liderit të opozitës që synonte të krijonte destabilitet, ndërkohë që në raste të tilla ekzistojnë institucionet ku duhen adresuar ankesat dhe jo të krijohet një propagandë politike e pabazuar për të nxitur efekte më agresive tek qytetarët”, tha ajo në emisionin “Trialog” në RTSH.
