Ilir Alimehmeti ka mbajtur fjalën në protestën që po mbahet këtë të martë te Kryeministria.
Ai thotë se për degradimin e Shqipërisë nuk ka fajtorë të tjerë përveç Edi Ramës, ndërsa shton se të vetmit që mund ta largojnë janë qytetarët.
Duke mos shpalosur asnjë skenar konkret nga ana e PD-së që do të bënte ndryshimin, edhe këtë herë përfaqësuesi opozitar ka bërë thirrje që qytetarët të angazhohen vetë për largimin e Ramës, që më pas sipas tij Shqipëria të fitojë, ose “Rilindja” dhe Edi Rama duhet të largohen vetë.
“Një orë e më parë duhet t’i themi këtij njeriu me pushtet absolut prej 13 vitesh se sot nuk ka më justifikime. Nuk ka më fajtorë të tjerë. Kur ke gjithë pushtetin, ke edhe gjithë përgjegjësinë. Mund të flasim për dështimin e qeverisë, por nuk ka akuzë më të madhe sesa ajo që vjen nga populli kur ikën. Kur populli largohet, kjo është akuza më e madhe: shpopullimi i vendit.
Unë kujtoj një vend ku kishim dy fjalë: nënë dhe baba. Kujtoj mashkull dhe femër. Sot kjo qeveri flet për dhjetëra gjini. Kujtoj një vend ku ndërtonim rrugë kombëtare të sigurta. Kujtoj një vend që hoqi vizat me vendet e BE-së dhe u bë anëtar i NATO-s. Kjo ishte e paimagjinueshme. Ne kemi arritur përpara. Ta kthejmë Shqipërinë te vlerat europiane. Duhet të largohet Rilindja, duhet të largohet Edi Rama. Kam para syve dhjetëra burra dhe gra që me forcën e tyre mund ta arrijnë këtë për ju dhe për familjet tuaja. Së bashku, po të qëndrojmë, Shqipëria fiton”,- u shpreh Alimehmeti.
